Certi cavei rizzoti inanelai
|
Edission original: |
Maffio Venier. Canzoni e sonetti. |
|
Fonte: |
| ← Sonetto LXII. Quel che par senza cassa un orinal | Edission e fonte ▼ | Sonetto LXIV. Co un ha gratia e che 'l veste pulìo → |
Certi cavei rizzoti inanelai,
Negri come un velùo negro de pelo,
Ornamento d'un viso cussì bello,
Co se possa a sto mondo veder mai;
Un pèr d'occhi assassini, che fa assai
Chi scampa via senza lassar del pelo,
Denti pò, lavri, e bocca, e tutto quelo
Che puol far desmissiar indromenzai.
Ma quel che avanza el resto è certa gola
Che, su la fede mia, de quel che son,
La val un pozzo d'oro quela sola.
E vita, e drappi, e disposition,
E gratia in ogni gesto, ogni parola,
Che fa stimar un savio Salamon.
No m'habiè per minchion,
Che voi pì presto un sguardo de custìa
Che 'l gran tresoro de la Signoria.