Arringa sul Decreto di Abolizione de' Frati/08
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← VII | Edission e fonte ▼ | IX → |
Ma no perdèmo el filo, perchè adesso
Su sta Scritura tanto decantada1
3Nu ghe faremo un poco de processo.
St’opera finalmente terminada,
Compida finalmente sta Scritura,
6I l’à a Vostre Zelenze presentada
Col farghene in Senato la letura;
Ma le prego con più de riflession
9Un’altra volta ben le la matura.
Co ghe vogiamo far osservazion
Ghe vederemo in quela un aparato
12Sul so principio pien de delusion,
Col qual se vol che per Ragion de Stato
S’abia da meter man ne le Man-morte
15Per interesse publico e privato,
Quando per strade anzi indirete e storte
Se cerca solo fora de scazzar
18Le Massime de Stato da ste Porte.
Le senta come mi ghel vòi provar.
(Parlemo de le Legi su le quali
21S’à voludo el Franceschi dilatar).
Queste tiolte in complesso le xe tali
Che anzi le vol che sia perpetuà
24Muneghe, Fraterìe, Preti e Ospedali.
Quele Legi che lu l’à epilogà,
Vostre Zelenze pol tocar con man
27Ch’altro efeto che questo no le fa.
Le tioga su le Legi del Sovran
Mazor Consegio del mile dusento.
30Za che le vol che andemo sì lontan,
E le me diga, se ghe sia là drento
Altro significato mai de quelo
33Ch’è de Riforma e de Regolamento?
No v’aspetè da mi, caro fradelo,
Che stracar el Pregai vogia sta sera,
36E che me vogia romper el cervelo
Tiolendo suso sta Scritura intiera
Per comentar parola per parola;
39Che co andassimo drio de sta cariera
Non basteràve una zornada sola.
Con pochissime cose mi me sbrigo,
42E le parole mi ve fermo in gola.
Sentìme ben come che mi v’intrigo:
Fra sta gran quantità che avè compresa
45Vorìa che me disessi, caro amigo,
Dove che interpretada, e non intesa
Sia a modo vostro la publica mente
48Su sta materia lunga e sì contesa;
E se se possa intender schietamente
Restrizion, sopression, e sora tuto
51Se sia stà decretà sovranamente
Che i Frati s’abia da spogiar de tuto,
E che privai i sia de quei possessi
54Che sin ora in sto Stato è stai per tuto
El corso de più secoli concessi,
Riconossudi e confermadi, o sia
57Da più Decreti chiaramente espressi
Del Consegio e Senato; questi in via
Deliberativa, queli in Statutaria,
60E in Giudiziaria da la Quarantìa.
Sto scritor el se dà tanta gran aria
D’interpretar el spirito e la forza
63De le Legi; ma sì per Dio, el savaria!
Le senta come qua me se rinforza
Sto ponto che mi trato de converso;
66Che s’el pol desmentirlo ch’el se sforza!
Vorìa saver da vu, se sia diverso
El senso d’una Lege che riforma,
69Da quela Lege che per ogni verso
Anichilada vol l’intiera forma
D’un Corpo, in modo che mai più aparissa
72De quel nessun vestigio e nessun’orma?
Sto divario in la mente le sel fissa,
Nè ghe vorà sforzo d’inzegno o d’arte
75Perchè Vostre Zelenze se stupissa
Deboto a la letura de ste Carte,2
Chiamade a giudicar, se sia adempida
78La Sovrana intenzion de ste tre Parte.
Perchè co’ questa no’ la sia eseguida,
Se la Rason de Stato se conservi
81Nel so intiero vigor, ele decida.
Ma se a le Legi no se ghe preservi
El spirito e la forza, ed ad alterarghe
84El senso, che se vogia che se snervi
La Massima de Stato, ò da provarghe.
- Note a cura de Bartolommeo Gamba