Arringa sul Decreto di Abolizione de' Frati/07
|
Edission original: |
Collezione delle migliori opere scritte in dialetto veneziano, Volume decimo: Poesie satiriche di Angelo Maria Labia, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 10.djvu |
| ← VI | Edission e fonte ▼ | VIII → |
Stabilido dai Savj el gran progeto;
Parto e disegno de l’ecelsa mente
3D’un riguardevolissimo sogeto,
La prima cosa a la qual seriamente
I ga pensà, la xe stada de tior
6Via quel impedimento dritamente;
El qual podeva fomentar l’umor,
In modo che insorgendo qualchedun
9Ferocemente el se vegnisse a opor;
E i temeva a rason che nel Comun
Comparisse a segnar l’Intromission
12Un dei tre Avogadori de Comun;
Perchè i saveva (che no gh’è quistion)
Che in pregiudizio de la Podestà
15Legislativa no gh’è prescrizion.
Dopo aver za in Consulta concretà
E formà tra de lori el so disegno,
18Per dessiparne co sta novità,
Con arte la più fina e con inzegno
(Direto solo da quel bel talento
21Che ga la soversion per meta e segno)
Al Senato i ga dà l’ecitamento
Perchè se decretasse a diritura
24La destruzion e l’anichilamento
Dei Regolari; e perchè più sicura
I podesse piantar la prima piera
27I à sugerido una Magistratura
La qual avesse la podestà intiera,
Senza esser a nessun assogetada,
30De far man bassa e de calar visiera;
E tanta autorità ghe fusse dada
Che, con nostro rossor, nei nostri Anali
33La fosse Ditatura un dì chiamada.
In conseguenza tre dei principali
Senatori, a covrir sto Magistrato
36In merito e virtù tuti tre uguali,
Subito xe sta eleti dal Senato
Perchè i dovesse sora de sto afar
39Prender notizia da per tuto el Stato:
E un Segretario i ga pensà de far
Che tra i so pari più se distinguesse
42Nel saver ste materie scriturar;
E voludo i à de più, che pur i avesse
A so disposizion un Computista
45Che i necessarj calcoli facesse.
Fra tuti queli che i gaveva in vista
Al Franceschi à tocà la bela sorte
48E al Rizzi d’esser soli messi in lista.
El primo in Religion spirito forte,
E l’altro in realizzar bravo e famoso
51Le partide più false e le più acorte.
Per riussir in st’impegno laborioso
Ognun de loro se ga messo drio
54A laorar note e dì senza riposo;
Perchè operando con fin giusto e pio
De poder otener degna mercede
57I sperava dal Prencipe e da Dio!
Anime rete, che con zelo e fede
Avè sudà per el publico ben,
60El gran merito vostro chi nol vede?
Mi deboto dirò quel che contien
St’opera cussì granda e sì famosa,
63E de vu dirò ben quel che convien.
Mi sarò quel che ghe farò la glosa
Aciò la gran fadiga che avè fato
66La se tramandi ai posteri gloriosa!
E de vu do’ mi farò quel ritrato
Che messo in la so’ vera prospetiva
69Ognun resterà pago e sodisfato;
Che cercarò un’immagine sì viva
De la semplicità più natural
72Che de vu do’ la sia la più espressiva;
In soma incontrarò l’Original
De sti do’ gran Ministri sì valenti
75Che à savudo scoprir un capital
Richissimo de Chiese e de Conventi
Per compier l’esterminio e la rovina
78De la Cità e del Stato, e trar proventi
Con arte maliziosa e soprafina,
Per saziar cussì el lusso, e ancora el vizio
81De la famegia, e de la Concubina
Che se mantien a spese del so Ofizio,
E col privato e col publico dano,
84E de la Religion col pregiudizio.
Eh le me scusi, se qua mi m’afano
Più del solito a vista de la sola
87Vergognosa ragion del nostro ingano.
Mi no go impedimento ne la gola,
Che la strada dal cuor sin a la boca
90In libertà me lassa la parola;
Che ’l gran dolor che l’anema me toca
Fa che a quel che mi sento e che mi vedo
93L’espression su i mi labri le me fioca;
E se el fervor, onde a nissun mi cedo,
Nol fusse rafrenà da quel riflesso
96Che modera i trasporti, mi prevedo
Che trabocar el me farìa in l’ecesso
De scordarme che parlo da sto logo
99Davanti a un rispetabile Consesso,
In fazza al qual el più inocente sfogo
Interpretà el sarìa per grave colpa
102Da chi de la rason scotendo el giogo
E Patria e Religion svissera e spolpa.