Ancò nevega
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← A spasso co le rose | Edission e fonte ▼ | L'Ave Maria → |
Una matina, el vento, che spassava
le foie morte, m'à robà el capel;
po' el m'à sigado ne le recie, forte:
«Ancó nevega!»
E mi, che, in fondo, son un bon putel
che lasso in passe tuti quanti e vivo
come un santo tacado al capitel,
g'ò risposto così come che scrivo:
«Bruto cativo, te gh'è el cor col pel...»
Ma lu da un montesèl de foie morte,
l'à sigado più forte:
«Ancó nevega!»
― La campanela de la ciesolina
tira la gente a messa prima: vien,
den-dèn,
den-dèn,
den-dèn,
batarelando1 qualche donetina,
co la scaldina e la corona in sen...
Ma el sol no camina,
ma el sol no camina...
― A pian teren de 'na pora cusina,
una mama va a torno,
(brontola un cogomin2 sul fogolar)
– Toni su, che l'è giorno,
va a lavorar.
Den-dèn,
den-dèn,
den-dèn..
Oh, che bruta matina,
par du sposeti che se vol del ben!
Ma el sol no camina,
ma el sol no camina...
...Ma in çima a le case
le pàssare tase,
le nuvole bise
le core spaise3
par l'aria girando –
Saltando, sgolando
su i copi, cative,
le prime falive
de neve, vien zo.
E in meso al bordelar de i me pensieri,
el vento che me scàncana4 le porte
e le finestre, e che me rompe i veri,
siga ancora più forte:
«Eco, che nevega!»
― Par che su in çiel, ghe sia, come una fórbese
che taia e taia sensa carità
tuti i vestiti e le ale bianche a i angeli
in fin che nudi e vergognosi i va;
tuta la lana, che fa su le pegore
che ne i campi del çiel pascola al sol;
tute le istanse che nualtri omeni
se ghe manda su a i santi, sensa bol!
Par, che su in çiel ghe sia come una fórbese,
che taia e taia sensa trar mai fià,
che cuerse case e campanili e albari,
che copa autuno primavera e istà;
che riduse sto mondo a no far ciacole
e che ghe stupa5 el beco al russignol;
che ghe sconde a i poareti anca le fregole,6
che li stófega drento a sto ninsol.
O inverno, inverno, canaia de fórbese,
inverno, inverno te sì el gran sartor;
ti te ghe scurti i giorni a quei che bàgola,
ma te ghe slonghi la velada al sior;
ti te tormenti quei che se scrivoltola
sora un leto che siga a l'ospedal,
soto i colpi de tosse che li sbómbola,
soto la rabia de sentirse mal...
O inverno, inverno canaia de fórbese,
inverno, inverno scapa via de quà:
dàghe indrîo le so foie a i nostri àlbari,
e la salute a quei che non ghe n'à!
Desfa 'sta neve! Primavera, aiuteme:
ciama in brasso sto vecio, da lontan;
fàghe caresse, fàghe inchini, bàselo,
che el to poeta te farà el rufian!
- Note