Son tanto irao, e si de mala voia
|
1557
|
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Daspuo che son sforzao de desperarme | Edission e fonte ▼ | Ho tanto l'intelletto desfrassao → |
Son tanto irao, e si de mala voia,
Che me contenterave per despeto
Esser el primo, che deventa un boia,
Voria che ognun si fosse maledeto,
Tristo, cattivo, gaioffo, e sassin,
E chel pare dal fio no fosse creto.
Desidero che mai no nassa vin.
E chel formento si deventa meio;
E chel no se trovasse pi oro fin,
Vorave veder Papa el mio fameio,
E che no s'arpiasse le puine,
E che ognun si vegnisse un'Epuleio.
Desidero de veder gran ruine
In tutti i hosti, in tutti i barcarioli;
In quei che vende pan, oio, fassine,
Voria veder signori i marioli,
E chel pesce scampasse mille mia;
E che no se trovasse ree, e cogoli.
Desidero veder per bizaria
El Sol, la Luna, le Stelle, i Pianeti,
Tutti drento una concha in zeladia.
Voria, che ognun trazesse tanti peti,
Che dal fetor vegnisse i homeni zali,
Mo che i crepasse trazandoli i preti.
Desidero sentir i anemali
Parlar latin, e dir le so rason;
E puo ch'ognun deventasse orinali.
Voria che no nascesse mai melon,
E che quei che vol dar sempre la baia,
Si fosse crui in bocca de Pluton.
Desidero che'l mar deventa paia,
E le lumaghe cora a scazzafasso,
E che i aseni, e i muli mai no raia.
Voria che ogni poltron fosse Gradesso,
E le montagne si tochasse'l cielo;
E che ogni porco si perdesse'l grasso.
Desidero assae morti, e mantelo,
E che quel che se magna no sia hon,
E che i prudenti si perda el cervelo,
Perche me trovo in desperation;
Voria che fosse sto mondo sorbio,
Con tutte le creature da un Sion;
E che no resta pi brigae da drio.