Daspuo che son sforzao de desperarme
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Madrigali | Edission e fonte ▼ | Son tanto irao, e si de mala voia → |
.jpg)
Possa vegnir tanta pioza dal Cielo,
Che siando in casa mia possa anegarme.
Possa cazer a i panni tutto el pelo,
E muora da desasio le putane;
E i frati sì deventa ognun gambelo.
Possa perder el son pive, e campane,
Deventa zonfi sertori, e becheri,
E no se trova pi buovoli, e rane.
Possa morir da gran fredo i stueri,
E vegna pieni de gote i Prelati,
E perda le recete i spicieri.
Possa vegnir tutti i dottori mati,
E perda anche la vose i cantaori;
E i sorzi daga de le bote a i gati.
Possa perder la luse i baraori.
E i soldai si deventa poltroni,
E vegna tutti i vilani signori.
Possa perder el vin i Borgognoni,
I Francesi, i Todeschi, i Transilvani,
I zaffi, i bravi, con tutti i Schiavoni.
Possa mancar le antigaie a i Romani,
E vegna'l pesce in frotta per le strae,
E perda l'Arcoran Turchi, e Marani.
Possa morir tutti da le contrae,
E tempesta per tutto el pan in forno,
E crepa anche le vache ingraviae.
Possa vegnir tanto scuro de zorno,
Che no se veda nianche cho i ferali,
E chi se bechi, se ghe veda un corno.
Possa deventar pisso puo i canali,
E le barche si deventa mosconi,
E chi le vuoga, vegna cascavali.
Possa vegnir el premito à i fantoni,
E i miedeghi deventa salamandre;
E i usurari deventar scufoni.
Possa vegnir le ruffiane gaiandre,
E i parasiti tutti tamburini;
E se trasforme in grue tutte le slandre.
Possa vegnir ziganti i Sarafini,
E tutti i gobbi si deventa scove,
E i arsirai cambiarse in calalini;
E le galine mai no faza vuove.