Sento a dir, che no se fà
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo II, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 2.djvu |
| ← Come, un Duca, che xe cussì pomposo | Edission e fonte ▼ | Do Donne fà baruffa, e se strapazza → |
Sento a dir, che no se fà
La regata in sto paese
In un tempo, che ghè quà
4Più d'un Prencipe, e Marchese.
In un tempo, che ghè un Duca,
Che nol fà vita privata,
Che se diga, strucca, struca
8No i gà fato la regata.
Dopo, che i gà speso tanto
In festini, e laute cene,
Quando, che per tutto quanto
12Se puol veder de ste scene:
E la cosa strepitosa,
Che no ghè, se nò a Venezia,
Che per tuto xe famosa,
16Ch'ogni Prencipe l'apprezzia
Questa quà no s'hà da far
In cussì bell'occasion!
E che s'abbia da contar
20Me despiase sta rason.
Che i parenti a chiare note
De sti quattro Deputai
No volendo far Peote,
24Che se diga, i xe spiantai;
O che pur bon'amicizia
Frà de lori no ghe sia,
E se diga, l'è avarizia,
28Per no dir spilorzerìa.
No vorrìa per tutto l'oro
Fuora andasse sti sentori;
Perchè certo el so decoro
32Perderave sti Signori.
Mi consegio chi hà l'onor
Sto Gran Duca de servir,
Ch'i altri staga nel so error,
36Ma de lori no far dir,
Perchè 'l Mondo, se no fallo,
Dirà, questo xe un pretesto
Per cavarse da sto ballo,
40E no far, che vada 'l resto.
Se fà veder, che se fà
Tutto quello, che se puol,
Che se i altri no ghe stà
44La so testa no ghe diol.
La regata xe una cossa
De natura so assae bella,
Sempre è megio far qual cosa,
48Che butarla in Callesella.
Tanto più quando se vede,
Che sto Duca ghe n'hà vogia:
Che lù stà quà sù sta fede,
52Che per questo nol se annogia;
Se de tori in te la piazza
I gà fato quela festa,
Per dar spasso a la plebazza,
56No i farà per lù pò questa?
Questa quà, che 'l puol zirar,
Come ho dito, tuto l' Mondo,
Mai, nè mai el puol trovar
60Un piaser el più giocondo.
Col mio cuor affettuoso
Digo ad ogni Deputato;
A sto Duca generoso
64Feghe veder el regato.