Prima se troverà ogni potta netta
|
Edission original: |
Maffio Venier. Canzoni e sonetti. |
|
Fonte: |
| ← Sonetto XLVIII. O Amor, perché no songio all'hora stao | Edission e fonte ▼ | Sonetto L. Se ti ha intention de darme da chiavar → |
Prima se troverà ogni potta netta
Che no habbia un fregolìn de tattarette,
Che sapia tutta d'acqua de moschette,
E stretta d'occhio co xe una magietta.
Prima ogni barca correrà a staffetta,
E andarà a vele i cocchi e le carrette,
(El) scuodarà (a) portar, coi se la mette,
Missier Partenio la beretta dretta.
Se vederà le donne de cervello
Voler esser da ben e le merlotte
Mandar la castità in posta al bordello,
Sarà in sta terra carestia de potte,
Dove che chi vuol spender un marcello
Havarà da chiavar quaranta botte,
Se vedarà la notte
Star le stelle correnti ferme in cielo,
E far le fisse el ballo del Capello,
Se trovarà a Castello
Un mar de marangoni e calaffai,
Senza pugnal, senza la targa a lai,
Se vedarà i soldai
Haver la borsa piena de gazzette,
Un Perdon senza occhi e senza tette,
E senza candellette,
E sarà ricco un dotto, un virtuoso,
Una puttana senza mal franzoso,
Un buzzaron famoso
Se porave trovar impaciente
Una bardassa che no sia insolente,
Mancarà finalmente
A un monastier de frati i cagaori,
E mancarà in Friul porci e dottori,
La Giobbia grassa, i tori,
Al dì del Corpus Domini i doppieri,
Dalla Sensa in sta terra i forestieri,
Le puttane ai trippieri,
I corrivi in le man a un pescaor,
No robbarà a tagiar nessun sartor,
Qualche gran zuogador
No cattarà sul zuogo alla bassetta,
E che 'l perda el zippon e la baretta
Nissuna candelletta,
Se trovarà barbieri in ogni terra
Che no te daga nuova della guerra,
E che una mai sia vera,
Todeschi abborrirà la botte e 'l vin,
E i putti el canto el dì de San Martin,
Farà le bone fin
Un che tutti i so dì sarà stà in Corte,
Un bullo morirà de bona morte,
Haverà buona sorte
Un cogion ricco in man d'una puttana,
Se farà un monastier de Carampana
Bastà sta settimana,
I Ebrei vedarà certo el so Mesìa
Andar in su in zo per Marzarìa,
Ghe sarà in beccarìa
Carne de manzo elletta e preciosa,
Una puttana sarà respetosa,
E sfazzada una sposa,
La Giesia de San Marco havarà fin,
Sta terra in ogni rio havarà un molìn,
Sarà bracco un mastìn,
Al Zante mancarà la Romania,
Mancherà el caviaro in la Turchia,
Le asse in Barbarìa,
A una puttana el ponte e l'hospeal,
Mancarà el mandolatto da Nadal,
A i zaffi el so bocal,
Sul ponte de Rialto chi ghe cria:
A chi véndio la spada desfornìa?
Chi compra la tacchìa?
A chi dàghio sti bei officietti?
Un pronostico nuovo co i so effetti
Che ve mostra i pianetti
Mi nol darò per un pezzo del pan!
Cento al soldo de guchie da Lanzan!
Chi vuol comprar un can?
La barceletta de Missier Sbruffaldo!
Chi vuol un bel rubin, un bel smiraldo?
Caldo el megiotto, caldo!
A chi fàccio piaser e bon marcà
De sta cordella da zènzer per ca'?
Quel che i altri ve dà,
Signori cari, tre brazza al grossetto,
Mi ve lo dago do brazza al marchetto!
Chi vuol un fazzoletto?
El mancarà el sabion e i palli a Lio,
E le donne da ben a san Mattìo,
La paura a un fallìo,
Le furbarìe e (le) chiachiere ai avocati,
Innanzi che mi vegna con ti a patti
Darte diese ducati.
Prima torave tanti bagattini
E farìa in acqua tanti passarini.