Per quel Bepi più grando
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Anniversario | Edission e fonte ▼ | Sfida → |
.jpg)
Cantate ei et psallite ei: narrate omnia mirabilia eius.
Psal. CIV, 2.
BENEDETO da Dio, Sol che te scaldi,
Con un baso d'amor, l'acqua turchina
Che dorme da Mazorbo a Pelestrina
Sognando el Dose che la sposarà;
Viva fiama de Sol, che de smeraldi
Te fiorissi el tremar de la marina,
Co', squasi un svol de smerghi, se indovina
Le vele bianche ne l'imensità;
Santa fiama de Sol, che te colori
Per le novizze i bocoli de i fiori
E te doni ai viventi el pan e 'l sal;
Co' te tramontarà nel mar stassera
Coverzi d'oro el scògio de Caprera,
Faghe un manto de porpora imortal!
Faghe un manto de gloria a Garibaldi,
Al Redentor de l'anima latina,
Che tra le spade, el fogo e la rovina,
Gà oferto el sangue per la libertà!
Basa el sepolcro cò i to ragi caldi,
El sepolcro da piè de la colina,
Soto i lentischi, in fazza a la divina
Calma del mar e de la eternità.
E adora, adora, adora!….. E dopo mori,
Cara fiama de Sol, soto i alori,
Nel silenzio solene e sterminà.
La note montarà freda e severa,
Dormirà l'onda, dormirà la tera,
Ma el cuor d'Italia mai nol dormirà!
Stupide crudeltà de Maramaldi,
Sporchezzi de petegole in cusina,
Ongie de gato e boche de latrina,
Su, finimola co ste infamità!
Mo cossa seu, perdio? Tanti ribaldi,
Che corè coi corteli a la rapina?
Ma che eredi de drita e de manzina!
Garibaldi no lassa eredità!
No el gà lassà, morendo, ai sucesori
Altro che una bandiera a tre colori
Come un pegno de pase universal.
Ecco la sola eredità, la vera!
In zenòcio davanti a la bandiera!
In zenòcio davanti al General!