Santa fiama de Sol, che te colori
Per le novizze i bocoli de i fiori
E te doni ai viventi el pan e 'l sal;
Co' te tramontarà nel mar stassera
Coverzi d'oro el scògio de Caprera,
Faghe un manto de porpora imortal!
Faghe un manto de gloria a Garibaldi,
Al Redentor de l'anima latina,
Che tra le spade, el fogo e la rovina,
Gà oferto el sangue per la libertà!
Basa el sepolcro cò i to ragi caldi,
El sepolcro da piè de la colina,
Soto i lentischi, in fazza a la divina
Calma del mar e de la eternità.
E adora, adora, adora!….. E dopo mori,
Cara fiama de Sol, soto i alori,
Nel silenzio solene e sterminà.
La note montarà freda e severa,
Dormirà l'onda, dormirà la tera,
Ma el cuor d'Italia mai nol dormirà!
Stupide crudeltà de Maramaldi,
Sporchezzi de petegole in cusina,
Ongie de gato e boche de latrina,
Su, finimola co ste infamità!
