Anniversario
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Dies illa | Edission e fonte ▼ | Per quel Bepi più grando → |
.jpg)
Il dolore è veramente una cosa augusta.
A. Fogazzaro, La bell. d'un'idea.
SE me recordo?! Giera el quatro Agosto,
Che, serà in caponèra e soto ciave,
Sudavimo in quel ludro de Conclave,
Un zorno coti a lesso, un zorno a rosto.
Se sentiva un odor tre mia discosto,
Ma che strazzo de odor poco soave!
Tra el bacalà, la pegola de nave
A 'l gorgonzola quando el xe indisposto.
I pulesi pareva calabroni,
I mussati pareva becanoti
E nualtri parevimo cordoni.
Magnàvimo un sporchezzo de pancoti,
Servi de Dio per deventar paroni...
Che infami zorni, caro lu, e che noti!!
Questo xe gnente! I xe quattr'ani ancuo
Che me trovavo in camera da leto
E, per via del calor, con bon respeto,
Me gera messo totalmente nuo
E pensavo a Salzan, co' xe vegnuo
Un Cardinal de Curia, povareto,
Che me gà dito pian come in segreto;
«Me ralegro con lu! Servitor suo!»
«Cossa galo, Eminenza?» gò risposto;
E lu: «Come? Nol sa ch'el Paracleto
In quanto al Papa el gà belo e disposto?»
E mi: «Ostregheta! E chi xelo l'eleto?»
E lu: «Eminenza, quelo xelso posto...»
E mi: «Ciò, crepa, sièstu maledetto!»
Ma i xe quatr'ani ancùo (che Dio ghe strapa
Le raise del cor... se i lo gavesse!)
Che, un po' per pica, un po' per interesse,
Sti fioi de vasche i me ga fato Papa.
Oh, perchè mai gò butà via la zapa
Per meterme sta veste e ste braghesse,
Che un drago pianzerìa s'el me vedesse
In sta preson de dove no se scapa?
Perchè el pensier tremendo el xe quel mai,
Quela condana a vita e sti guardiani
Che me sorveglia e, se me movo, guai!...
La varda quanti augùri de Sovrani,
De Principi, Ministri e Deputai...
Grazie! Ma camparògio altri quatr'ani?