Nubi
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← I pelegrini | Edission e fonte ▼ | El retrato → |
![](http://upload.wikimedia.org/wikipedia/commons/thumb/6/68/Le_Ci%C3%A0cole_de_Bepi%2C_Roma_1908_%28page_90_crop%29.jpg/400px-Le_Ci%C3%A0cole_de_Bepi%2C_Roma_1908_%28page_90_crop%29.jpg)
Tra le nubi ecco il turchino.
G. Carducci. Nostalgia.
Co gò fenìo la messa,
Fazo el ringraziamento
Davanti al Sacramento
Ne la capela stessa;
Sento l'odor de incenso
Che me ralegra tanto
E sul Vangelo santo
Sbasso la testa e penso.
Penso: el Signore me vede
E sa come darìa
Tuta la vita mia
Per la so santa fede,
Sa ch'el so Bepi in fondo
Xe bon e xe inocente
E pianze amaramente
Sora i pecai del mondo,
Sa con che cor racolge
Chi se renova in Cristo,
Come perdona al tristo
Che da l'eror se tolge,
Che i omini e le cose
Vorìa veder in tera
In pase e bontà vera
A l'ombra de la crose;
E pur, se xe permesso,
In fondo al cor me sento
Indolentrà, scontento
De i altri e de mi stessso.
Cussì soffro, soporto,
Ma qualche volta digo
Che questo xe un castigo
Che me sassina a torto.
Perchè? Sbasso la testa
Al Pare onipotente,
Ma da lontan se sente
Un fremito de festa,
Un'eco de lontane
Vose nel ciel vibranti
E un giubilo de canti
Fra el son de le campane.
Perchè? Su dai boscheti
De zelsomini e riose,
Sento trilar la ' ose
Ciàra de i oseleti;
Le rondene se perde
Nel cielo pien de strili
E un popolo de grili
Conta ne l'erba verde.
Perchè? Se Dio gà cura
Nel so paterno afeto
Fin del più vile inseto
Che xe so creatura,
Perchè le 'rechie el sera,
Severo, al nostro pianto?
Perchè el castiga tanto
El so Vicario in tera?
Varè! Nel firmamento
Libere, svelte, franche,
Le nuvolete bianche
Vola seguendo el vento;
Le vola alegramente
Drento al turchin de' cieli,
Stormo de bianchi oseli
Che zerca l'oriente.
Ah, se anca mi con loro
Svolar podesse in alto
E riveder Rialto
E 'l mio San Marco d'oro,
Sentir quei premi e stai
Che zo in canal sentivo,
Vedar el mar che, vivo,
Non vedarò più mai!
Le zogie? E chi ghe bada,
Se gnanca so d'averle,
Se val pin che le perle
Do giozze de rosada,
Se val più el ciel che ride
Nei liberi tramonti,
Che no i avari conti
De Propaganda Fide?
O Signor mio, perdona
A sto parlar sincero,
Dove l'oror del vero
Amaramente sona;
Ma ti che in ciel te scrivi
I meriti e anca i torti
Abi pietà dei morti...
Ma un poco anca dei vivi!