I pelegrini
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Andando a letto | Edission e fonte ▼ | Nubi → |
.jpg)
Non apparebis in conspecto meo vacuus.
Exod. XXIII, 15.
CHE compassion con sti ricevimenti,
Che Dio ne scampa tuti!
Strazoni e puzolenti.
Che i no se pol vardar, tanto i xe bruti;
Le pelegrine gà la vesta scura,
I, omini la velada
E tuti i gà premura
Che i gà la bote che li aspeta in strada.
I canta in coro Pater Ave Gloria
Stonando che i fa pena
E i fenisse la storia
Col darme un indirizo in bergamena;
E dopo vien coi so catàri, in rigà,
Le vecie buzancone,
Perchè ghe benediga
Un sacco de pupazzi e de corone,
Che mi levo la man, fazzo la croze,
Brontolando un in pace
E lori a strazza 'ose
Cria: Viva el Papa Re! Che bele mace!
E infin mezo balordi e replicando
Salamelèche e inchini,
I se ne va, lassando
Una tremenda spuzza de scapini.
Pensè, putei, la xe una gran carèta
Che tiro e, con licenza
Se molo un'ostregheta,
Anca el Signor el gavarà pazienza,
Chè l'Obolo el xe scarso, e i bezzi cala
E bisogna agiutarse.
Semo in balo e se bala
Piutosto mal con le finanze scarse.
E tanto più che molte volte, in posto
De la moneda fina,
Ste vecie, de nascosto,
Le me caluma i schei
Cussì fadigo la zornada intera,
Ch'el xe longo el raconto,
E quando semo a sera
Se fa col Segretario un fia de conto.
Digo: ― «Ciò, varda, cossa s'è racolto?
― «Cinque lire e tre schei.
― «Cospeto! Nol xe molto!
― «... « E tre palanche false». Eterni Dei!
«Ma dunque i piopa el rame falso a Dio!
«Canagia! E cossa i crede?
«Ah, Segretario mio,
«No ghè più religion, no ghè più fede!»