El retrato
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Nubi | Edission e fonte ▼ | Terribile → |
.jpg)
Goldoni. L'uomo di mondo, A. I, Sc. XVII.
I XE ignoranti! La fotografia
Mi ghe la spiegarò pulito, sala,
Tanto in pratica quanto in teoria.
Ecco! I me mete el donzelon de gala,
I me peta in carega gestatoria
E i sediari me porta per la scala
Che alora digo una giaculatoria
E crio: «Putei, ste atenti... andèmo a pian!
«Ocio ai scalini, Dio ve gabia in gloria!»
E co' i se ferma, càpita un cristian
Che gà in testa un zendà come un strigon
E che me pianta in fazza un tamburlan,
Me spalpugna, me mete in posizion,
Po' monta el crico al machinismo, e cria:
«Ne bugè pà la tette, sacrenon!»
Dopo el dise bonsuàr e po' el va via.
Me galo inteso? Gogio ben spiegà
Come se spiega la fotografia?
Questa xe scienza che anca lu el lo sa
Che a capirla ghe vol quel don del cielo
Che solo el Santo Spirito lo dà!
E me ne intendo, védelo! Co' quelo
Me varda da quel buso, mi me inzegno
E meto in prospetiva el sagro anelo
Perchè tuti i capissa da quel segno
Che dopo del Signor ghe vegno mi,
Come prova sto maro de treregno!
Dopo, el retrato lo regalo a chi
Porta l'obolo qua dal so paese
Che po' i me dise: Bepi, remersì!
Lo regalo anca ai veci de Riese
Co' i vien a visitarme in procession
E ghe fazzo la dedica in francese.
Tolé! La varda l'ultimo, paron!
Co' belo! No la xe una meravegia?
L'anelo? Ma sicuro ch'el xe bon!
E po' la varda come el ghe somegia!