Le tabachine
|
Edission original: |
Riccardo Selvatico, Commedie e Poesie Veneziane, a cura de Antonio Fradeletto, Milano, Fratelli Treves editori, 1910 |
|
Fonte: |
Indice:Selvatico - Commedie e Poesie Veneziane, Milano, Treves, 1910.pdf |
| Edission e fonte ▼ |
Bate quatro e za scominzia
Nel silenzio de la strada,
Fin alora indormenzada,
A sentirse da lontan
Come un susio, che in distanza
Da prinçipio xe confuso,
Ma che ingrossa, che vien suso
Co’ una furia de uragan.
Le xe lore, za le ariva,
Za le spunta, za in t’un lampo
Case, strada, ponte, campo,
Tuto introna de bacan.
Le xe lore, le xe tose,
Le ga el viso fresco e tondo,
Le vien via sfidando el mondo,
Imbriagae de zoventù.
Zavatando per i ponti,
Le vien zoso a quatro in riga,
Par che a tuti le ghe ziga:
Largo, indrio, che semo nu!
Za la zente su le porte
Stà a vardar la baraonda,
Che infuriando come un’onda,
Urta, spenze e passa in là:
Qua un vecieto scaturio
Va tirandose drio al muro;
Là una vecia, più al sicuro,
Varda e ride dal balcon.
Ma le ariva e za le passa,
El xe un rèfolo de vento,
Za el fracasso in t'un momento
Va perdendose lontan.
E la strada per un punto
Da quel ciasso desmissiada,
Quieta, straca, abandonada,
La se torna a indormenzar.