LE TABACHINE.
Bate quatro e za scominzia
Nel silenzio de la strada,
Fin alora indormenzada,
A sentirse da lontan
Come un susio, che in distanza
Da prinçipio xe confuso,
Ma che ingrossa, che vien suso
Co’ una furia de uragan.
Le xe lore, za le ariva,
Za le spunta, za in t’un lampo
Case, strada, ponte, campo,
Tuto introna de bacan.
Le xe lore, le xe tose,
Le ga el viso fresco e tondo,
Le vien via sfidando el mondo,
Imbriagae de zoventù.
Zavatando per i ponti,
Le vien zoso a quatro in riga,
Par che a tuti le ghe ziga:
Largo, indrio, che semo nu!
