La storia de na sartina
|
Edission original: |
Giovanni Ceriotto, Poesie veronesi, Seconda edizione accresciuta, Verona, Remigio Cabianca editore, 1911 |
|
Fonte: |
| ← La bionda in piassa | Edission e fonte ▼ | La bionda e la fiorareta → |
Fin che la neve a pian zugatolava
prima de indormensarse su le strade,
quando l'alba d'inverno se strussiava
4per darghe i primi ciari a le contrade;
con quela neve che parea laneta
fata per sbianchesar camini e case
e per metarghe in testa la bareta
8al campanil che sona e a quel che tase;
serada su con quel tabar a spale
scondendo el corpetin streto in cintura,
co le falive che parea farfale
12che te fasea l'amor sensa paura,
e con quel serto andar de ci camina
co la recia a penel spetando l'ora,
mi t'ò visto passar bela sartina
16da i oci strachi e da la tressa mora.
Da i oci strachi, ma col cor contento
de guadagnarte el pan co l'ucia e el dial:
dove un camin el brusa sempre atento
20par scaldarte le man sul to grombial;
dove se canta le canson più bele
imparade tra i monti e le valade,
canson robade soto le tirele
24drio le rive de i fossi inamorade:
dove se sogna un leto tuto bianco
in t'un bel loghetin più bianco ancora,
per posarghe i cavei che casca in fianco
28quei bei cavei de la to tressa mora;
dove le spale se anca le se cucia
le lassa el posto parchè bata el cor,
dove ogni ponto tirà su co l'ucia
32g'à le so strussie, ma no g'à dolor!
Come se sveia un fior de primavera
spetando el sol e respirando el prà,
spetando el sol su la to tressa nera
36respirando anca ti te t'è sveià.
El sol sercando i sbaci più a bon'ora
l'è capitado a piturarte el leto,
e ti davanti al specio a trarte fora
40qualche risso de più par far più efeto,
Quela matina t'è cambià un vestito
fato da ti e che te stasea più ben,
col vel in testa comodà pulito
44lassando verto el coresin sul sen.
E così tuta fresca e inamorada
t'è cambiado el pensier par un momento,
quela matina t'è cambià de strada
48con ci t'aveva dà un'apuntamento;
e via soto a quel sol pien de promesse
che fa sparir da i campi la rosada,
soto a 'na vigna dove l'erba cresse
52a torno a 'na marenda improvisada;
duve la vita el par che la te canta
un destin pien de basi e de caresse,
ma l'è 'na vita invesse che se vanta
56de cose disoneste e sempre istesse.
Una note sul leto comodado
spetando de indorarse a un'altro sol,
una gossa de pianto s'à ingropado
60su i orli bianchi del to bel ninsol.
E adesso sola in te 'na casa nova
dove i speci i te guarda e i la le sgogne,
che par quanto se serca no se trova
64che speci da speciar le to vargogne;
te voressi tornar quela sartina
da i oci strachi e da la tressa mora;
te voressi tornar a la matina
68dal to grombial che te ricorda ancora,
dove le spale se anca le se cucia
le lassa al posto parchè bata el cor,
dove ogni ponto tirà su co l'ucia
72g'à le so strussie, ma no g'à dolor!