La bionda e la fiorareta
|
Edission original: |
Giovanni Ceriotto, Poesie veronesi, Seconda edizione accresciuta, Verona, Remigio Cabianca editore, 1911 |
|
Fonte: |
| ← La storia de na sartina | Edission e fonte ▼ | L'orbo e l'organeto → |
Da quel giorno che in fianco a la fontana
de fassada a i orevesi a bon'ora
l'è capitada in piassa svelta e sana
4la fiorareta da la tressa mora;
da quel giorno che 'l sol zo da i granari
piovendo in sima al so tapeto d'oro
el s'à incontrado con quei oci ciari
8drio la fontana che cantava el coro;
da quel momento la me bionda in piassa
la magna bile e mai no la se chieta,
no gh'è madone, no la vol che passa
12davanti al banco de la fiorareta.
La se sbrassola tuta e la sburtona
le so donete che va far la spesa,
la sbalia el buso de le sporte e sona
16là su la Tor le dodese a distesa.
La fioiareta in meso a le so foie
l'è ancora nova de la piassa e sola
no la capisse cosa che ghe boie
20drento nel cor de la me frutarola.
L'è come 'na colomba da le pene
che se destira al sol de primavera,
la coerse ancora i segni de le vene
24zo par el col co la so tressa nera.
La me dise: — El toga questa,
l'è 'na rosa sensa spini,
l'è un udor che va a la testa...
28la me mostra i so dentini.
Te si redena de un bisso
che me brusa ne le mane;
fiorareta mi capisso
32le cansone più lontane!
Fiorareta drio a i to vasi
la me bionda se dispera:
la lo sa che te me piasi,
36mi ghe digo: No l'è vera!
Ma za el cor de la me bionda
l'è geloso e no 'l ghe mola;
da lontan se sente un'onda
40de improperie e ne la gola
le se smorsa come el pianto
che no bagna ma che 'l sente
qualche pòtola ogni tanto
44che se stofega par gnente:
la m'à fato za la tira,
me la moco e vado via,
la me bionda la respira
48finalmente... ma la cria!