La permalosa
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← L'ingenuo | Edission e fonte ▼ | El bariloto → |
Giudita, la muger
De Menego, stafier
In casa del baron Dario Colona,
Un demonio de dona,
5Un deciso soldà,
Da dir la ga catà,
No so per che rason,
Co Bepo in quela casa barcariol,
Che gera l'ochio dreto del paron,
10Un bonissimo fiol,
El qual da quel serpente provocà
Co tante vilanie de nova data,
Su le furie montà
El ze anda zoso come chiara - mata,
15Disendoghe più p,
Disendoghe più v,
Più remenada
Per tuta la contrada,
E fra tante insolenze ricordando
20Come che smorosando
Co quanti se imbateva,
Prima de tor mario
Do tosi la gaveva
Partorio,
25Ricordo che a Giudita ga podesto
Sora de tuto el resto.
Sta striga maledeta
Per far una vendeta
Va a trovar el paron
30De Bepo, e pronta
Fifando la ghe conta,
Che quel can, quel baron,
L'à strapazzada
Su una publica strada,
35E che da scelerato
In oltragio al so onor
L'à sina avudo cuor
De dir che la ga fato,
Per tropo abandonarse
40Coi morosi,
Prima de maridarse
Un per de tosi;
Dunque che lo pregava
Aciò ghe fusse dada,
45Come 'l se meritava,
Almanco una solene strapazzaci,
Se no la lo faria
Chiamar davanti de la pulizia
A renderghene conto,
50E senza remission
Darghe sodisfazion
Del fato afronto.
El paron
Assae bon,
55Ma assae più dreto,
Ghe risponde a Giudita — ve prometo,
Che drento la matina
A Bepo ghe darò una romanzina
Da servirlo da festa,
60Da far che no ghe resta
Un pel de suto:
E riguardo ai do tosi sora tuto,
Perchè ò esperimentà.
Che del mal che lu dise de la zente
65Ze vera solamente
La metà.
— Contenta contentona
Sta stolida de dona
La core che la svola
70A dir in ogni sito
Parola per parola
Quel che 'l paron ga dito,
No avendo gnente afato
Capio el significato.
75Per cercar de aver rason
El balordo, el poco acorto,
Dise senza distinzion
Anca quel che ghe fa torto.