El bariloto
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La permalosa | Edission e fonte ▼ | El codicilo → |
Sior Momolo Talpon,
Da san Malò,
Un galantomenon,
Ma tondo come l'o,
5Co tuta gelosia
Tegniva messo via
Drento in cantina,
Sigilada la spina,
E sigilà el cocon
10Per bona precauzion,
Un bariloto intato
D'ecelente moscato,
Facendoghe ogni sera
Prima de andar in leto
15Un'ispezion severa,
Un esame completo
Da per tute le bande
Per osservar se 'l spande,
Se l'è sogià sicuro,
20Se i cerchi ghe tien duro,
Se le doghe fa dani,
Se i fondi resta sani,
E se i sigili messi
Co grandissima cura
25Fusse per aventura
Manomessi,
Senz'acorzerse mai che so muger,
Diletante grandissima del goto,
Megio de un ingegner
30Gaveva per dessoto
Fato un picolo buso in te la panza,
Dove con divozion
Spesso la andava a tor la perdonanza.
E ghe faceva un prindese a Talpon.
35Do mesi de presenza
Sior Momolo ga avudo la pazienza
De seguitar sta festa,
Quando ghe vien in testa
Una matina
40De andar zoso in cantina,
E con un deo ridoto
In forma de scagnelo,
Co la rechia a penelo
Pusada al bariloto,
45De baterghe la panza,
Come se ga l'usanza
De far in ogni caso,
Nel qual conoscer ben
Se vogia se un arnaso
50Sia semo o pur sia pien;
E tuntum e tuntum, bati e rìbati
Ora a dreta, ora a zanca,
Nol se ne pol dar pati,
Capisse sior Talpon
55Da l'indole del son
Che ghe ne manca,
Ma nonostante per provar se 'l sia
Scaldà la fantasia
Ghe salta el grilo
60De romper el sigilo
Del cocon,
De po cavarlo via,
De introdurghe un baston,
E perdiana de dia
65Che dal segno, col qual lo tira fora
Sutissimo un bon toco,
Resta convinto alora
De no averse inganà
Che ghe n'è stà robà,
70Nè gnanca poco.
Sorpreso quanto mai se possa dir,
No arivando a capir
Come i possa aver fato
Dopo tanta atenzion
75A robarghe 'l moscato,
Se la spina e 'l cocon
Gaveva ancora
I so sigili sora
Tal qual che i ghe ze stai
80Da lu istesso aplicai,
Se no s'aveva mosso
L'arnaso, e dapertuto
Deposta come un osso
El gera suto
85Da poderse acertar che no l'è roto,
Nè se vedeva segno,
Che fosse stà introdoto
Qualche ordegno
De quei che apianpianin
90Serve a cavar el vin
Senza usar de la spina o del cocon,
Sior Momolo Talpon
A contarghe l'afar co stupor grando
Va a casa de Zaneto,
95Che assae de lu più dreto
El ghe risponde — quando
I sigili aplicai
In modo diligente
Intati sia restai
100Precisamente,
Quando no gh'è malani,
Che gabia fato dani,
E quando restà intato
Sia pertuto dessora el bariloto,
105Ze certo che 'l moscato
Robà i l'à per dessoto. —
Sior Momolo Talpon
Sogiunge alora:
— Questa ze da zucon,
110Se 'l vin manca dessora! —
I riflessi più chiari e più patochi
No ze bastanti a persuader i gnochi.