La grazia
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El cativo pitor | Edission e fonte ▼ | El palo → |
Rosa muger de Nane,
De massime cristiane
E de bon cuor,
Dopo esser stada
5Sete mesi a rigor,
I calcoli no fala, maridada,
(Tempo che ga bastà graziando el Cielo
A far tanto de toco de putelo,
Perchè a le primarole in sti paesi
10Rare volte ghe ocore i nove mesi)
Fusse per natural disposizion,
O volesse 'l demonio
Che fusse 'l matrimonio
La rason,
15So povaro mario,
Che per fortuna ghe tirava dreto,
El se ghe buta in leto
Talmente desconio
Da meter in paura
20Don Desiderio medico a la cura,
El qual
No conoscendo el mal,
Come se vede
Che pur tropo sucede
25Ai medici ignoranti,
E anca qualche volta a quei sapienti,
A furia de purganti
A son de deprimenti,
Riduse 'l so cliente
30Un steco, un curadente,
E rinunciando afato
A le speranze tute
De rimeterlo in stato
De salute,
35Se reputa in dover
Don Desiderio
De avertir la muger,
Che 'l mal va sempre più fandose serio,
E se fa serio tanto
40Da presagir che nol la passa suta
Se no gh'è qualche santo
Che lo agiuta.
Rosa dona de fede,
Che fermamente crede
45Ai segnalati e tanti
Favori che dispensa
Sora la tera i santi,
La se pensa
Co del fervor imenso
50Subito de invodarlo
A san Vicenzo,
Pregandolo che 'l vogia risanarlo;
Ma apena fato el voto
So mario,
55Cadavere ridoto
Ga dà l'anima a Dio.
Essendo, come ò dito, religiosa
Oltremisura,
La se rassegna Rosa
60A sta sventura,
E con un requie al morto
La fa l'esclamazion:
— Santo! m'ò acorto
Che sè a l'ecesso bon,
65Avendome acordà
Più assae de quelo che v'ò domandà.
Che no sia me despiase sta petegola
Una ecezion ingrata de la regola.