El cativo pitor
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← L'ignorante | Edission e fonte ▼ | La grazia → |
Piero co la mania d'esser pitor
D'una non ordinaria abilità
Gera invece un oror
Degno de poder star classificà
5Co quel vero marzoco,
Che dusent'ani fa
Ga dipinto un san Roco
Bruto tanto
Da distinguer apena el can dal santo,
10A grado che contrito
De aver fato un strapazzo, de so man
Soto el quadro ga scrito:
«Questo ze 'l santo e questo qua ze 'l can»
Carlo franco e sincero,
15Amigo cordialissimo de Piero,
Lo va a trovar
In quelo
Che 'l fava sbarazzar
El so tinelo:
20Malapena l'è entrà
Curioso per natura
L'à prima saludà,
E po ga domandà
Percossa el fava far quela fatura.
25Piero per contentarlo
El ghe risponde a Carlo:
— Me son determinà
De sbianchizzar el muro,
Che ga necessità,
30E quando l'è sugà
Mi lo pituro —
— Ti! — Carlo esclama alora
Senza pensarghe sora
— Ti lo vol piturar,
35Distu davero!
In quel caso me par,
Caro el mio Piero,
Che saria megio prima piturarlo,
E dopo sbianchizzarlo —
40Chi gavesse un amigo come Carlo
Sarave da invidiarlo,
Ma de sti amici adesso semo senza,
E par che sia sin persa la semenza.