L'orbo e l'organeto
|
Edission original: |
Giovanni Ceriotto, Poesie veronesi, Seconda edizione accresciuta, Verona, Remigio Cabianca editore, 1911 |
|
Fonte: |
| ← La bionda e la fiorareta | Edission e fonte ▼ |
Da la me casa sento un'organeto
che sul canton el seguita sonar
'na cansoneta che me fa l'efeto
4che la se voia sempre lamentar.
L'è un'orbo che lo porta e che lo sona
girando el brasso drio 'na manovela,
le note strache el par che le rasona
8co 'na canson che un giorno l'era bela.
Un giorno l'era bela, parchè adesso
ghe manca qualche tasto e qualche dente,
ma l'organeto el te la sona istesso
12come par dir: no me n'importa gnente;
me basta che 'l me vecio el sia contento,
che se un giorno dovesse scantinar,
i ultimi tasti i se rebalta drento
16e el mecanismo no pol più girar.
E pensando al so vecio ghe vien fora
serte rosarie che ghe slarga el cor,
musica bela se de sente ancora
20la cansoneta la g'à più saor.
Ma quei momenti i dura massa poco
e i se missia co i passi de la gente;
el motivo el se ferma par un s-cioco
24de qualche tasto che à sbaliado el dente.
Ma quei che passa no ghe bada tanto
se no l'è proprio musica parfeta;
gh'è la doneta che a favor de un santo
28prova a sacrificar 'na palancheta;
ogni matina passa un pensionato
che par no averghe proprio più da far,
l'à ciapà l'ambission de far quel'ato
32che par lo più la gente stenta a far.
Quei che ghe tien de più a la cansoneta
i è quatro mostri che g'à bona recia;
i se ghe taca atorno a la casseta
36col serto far de conosensa vecia;
Ma i g'à nel sangue tuto el desiderio
de torlo in giro quando che 'l scantina,
che l'organeto el te deventa serio
40come i l'avesse ponto co 'na spina.
El ghe buta un'ociada al so veceto,
ghe se strense le vissare del cor,
el mecanismo intanto el fa l'efeto
44che 'l se rosega tuto dal dolor.
No state desparar se par de fora
se sente i tasti a sopegar de spesso;
gh'è tanta gente sopa che laora
48e pur, te vedi, el mondo el gira stesso!