L'Omo no gà da creder, se nò quando
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo IV, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 4.djvu |
| ← Te ne incago, Natura malandrina | Edission e fonte ▼ | Le mie meditazion le xe in pensar → |
L'Omo no gà da creder, se nò quando
Da un'intiera evidenza 'l xe costretto,
Questo xe'l mio principio, ch'in secretto
4Vago colla mia mente ruminando.
Mi no trovo in un Mondo cussì grando,
Se nò motto, e materia, e 'l mio intelletto
Fuora no puol andar mai de sto stretto
8Per quanto, che lù và filosofando.
D'una materia immensa, e sempiterna
Nel sen fecondo se produse'l tutto
11Co una revoluzion de forma eterna;
Che quel, che giera fior, albero, e frutto,
Deventa sasso, e legno, ch'un'interna
Forza dà vita a quel, che xe destrutto.
15Mi digo sutto, sutto,
Che, co i Omeni al Mondo hà sentì i toni,
I hà cattà fuora i Giovi, e anca i Plutoni.
18Terrori da Cogioni
Xe 'l Cerbero, e la barca de Caronte,
El fiume Lete, e quel de Flegetonte;
21Che in quel celeste monte
Nù bevaremo'l nettare coi Dei,
E baseremo 'l Culo ai Semidei.
24Sti pensieri sì bei,
Ste imagini, che tanto le ne piase,
Le xe buzare grande, come Case.
27Quel, che pò me despiase,
Voler, ch'i Omeni sia savj, e virtuosi,
Che per natura i xe matti, e viziosi.
30Oh semo pur curiosi!
Come, che i Agnelli nasce mansuetti,
Feroci i Leon nasce, e maledetti;
33Cussì diversi effetti
Fà, che i Omeni nassa savj, e boni,
Altri pieni de fuogo, e scavezzoni.
36Lo sà ben sti testoni,
Se una necessità, che no s'intende,
Causa tutte del Mondo le vicende;
39Che gnente se comprende,
E che, quando aver fatto un ben se crede,
D'aver fatto 'na buzara se vede.
42Cos'è pò sto aver fede,
Che ghe sia un Esser bon, savio, e potente,
Quando ghè tanti mali trà la zente?
45Mi vedo un prepotente,
Che stermina, e rovina questo, e quelo,
E tien un innocente in t'un Castelo.
48Vedo a cascar dal Cielo
Un fulmine, che mazza in un istante
Tanto un Omo da ben, quanto un furfante.
51Ma come xelo amante
Delle creature soe, quando che 'l lassa,
Ch'un terremotto una Città sconquassa?
54Che tanti se fraccassa,
E che vaga sepolte in le rovine
Tanto le bone, quanto le Sgualdrine?
57Ste Creature meschine
Quando 'l le puol salvar, e nol lo fà,
In che consiste la so gran bonta?
60E se pò lù no gà
Una forza de tanta sufficienza,
In dove mai xe la so gran potenza?
63E se un'intelligenza
Ghe xe là sù, che mi nol sò, gramazzo,
Ella dell'Omo no ghe pensa un Cazzo;
66E, se quel bel solazzo
Al Mondo no ghe fusse della Mona,
La sarìa una gran vita buzarona.