L'Ape
|
XVIII secolo
|
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| Edission e fonte ▼ |
Dime, Avéta bonoriva,
Perchè avanzistu l'Aurora?
No gh'è ancora anema viva,
4No rossiza i monti ancora;
Trema e luse in ogni parte
Su l'erbete ancora intate
La rosada: ah! no bagnarte
8L'ale d'oro delicate.
Nei so' verdi bocoleti,
Streti suso e fati in massa,
Sonachiosi xe i fioreti
12Co la testa ancora bassa.
Mo via fermite cativa,
No stracar le alete ancora;
Dime, Avéta bonoriva,
16Perchè avanzistu l'Aurora?
Vustu miel? cerchistu questo?
Sera l'ale e no stracarte,
Mi te insegno un logo presto
20Da suzzarlo e sbabazzarte.
La mia Nina a l'ochio belo
Ti conossi, e a le fatezze;
Svola al lavro; apunto in quelo
24No ga fin gusti e dolcezze.
Sì, in quel lavro che un soriso,
Un soriso adesso infiora,
Ghe xe un miel de paradiso...
28No ti suzzi, Avéta, ancora?