Inno alla Morte

by Anton Maria Lamberti

3 Inno alla Morte Anton Maria Lamberti XVIII Poesie Indice:Collezione delle migliori opere scritte in dialetto veneziano 1.djvu Altra edizion: Ino a la Morte (1845)

Anton Maria Lamberti

Inno alla Morte

XVIII secolo

Edission original:	Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 1.djvu

Edission e fonte ▼

Altra edizion: Ino a la Morte (1845)

INNO

ALLA

MORTE

ALLA MORTE

Ti, Dea teribile,
     Ti, dei mortali
     3Arbitra e despota
     Senza rivali,
     Ti, che ti domini
     6La tera e 'l mar;
Ti, che le porpore
     E le corone,
     9Che al pien dei omeni
     Tanto ghe impone,
     Coi sachi e i zocoli
     12Ti sa missiar;
Ti, che l'imperio
     De la fortuna,
     15Che me perseguita
     Sin da la cuna,
     Da formidabile
     18Ti sa domar;

Ti, che quei stimoli
     Discordi tanto,
     21Che porta i omeni
     De pianto in pianto,
     Che li fa martiri,
     24Ti sa quietar;
E ti, che al misero
     Senza conforto
     27Con man benefica
     T'insegni el porto,
     Ti, Dea teribile,
     30Voi' celebrar.
Quanto xe stolidi
     Chi destrutrice
     33Te chiama, o provida
     Generatrice!
     Quanto i xe deboli
     36Nel so pensar!
Dal dì primissimo
     Che sui mortali
     39E falce e fiacola
     E l'arco e i strali
     T'à dà 'l trifulmine
     42Per dominar,
In tanti secoli
     Ch'el mondo zira,
     45L'imenso numero
     De chi respira

     S'ha visto simile
     48Sempre a restar.
No ti è che pausa
     De la Natura;
     51Se un omo termina,
     La specie dura;
     E spezie e generi
     54Ti fa tornar;
Che quel che regola
     Sto nostro mondo
     57Quanti individui
     Vive qua in fondo
     Come tanti atomi
     60Sa contemplar.
E quela fiacola,
     Che ne destruze,
     63In miera d'esseri
     Spande la luse,
     E in miera d'esseri
     66Ne fa cambiar.¹
Ma ne l'empireo,
     Ma ne l'inferno
     69Nome più provido
     Nel so governo
     Chi sa trovarmelo,
     72Chi 'l sa idear?

Forse un Prometeo,
     Che vita e forma
     75À dà a la polvere
     Che ne conforma,
     Che ragionevoli
     78N'à bu a crear?
Che a virtù languida
     L'à insieme unito
     81Ogni delirio,
     Ogni prurito,
     Che l'imbramabile
     84Ne fa bramar?
Ah! quanto infausto
     Sia stà ogni dono,
     87Le tante supliche
     Che gh'è al to trono,
     Dea potentissima,
     90Lo sa provar.
Sarè giustissimi
     Numi del Cielo,
     93Ma impenetrabile
     Destendè un velo,
     E lassè un adito
     96De mormorar.
Morte al contrario
     Senza mistero
     99Dona benefica,
     Sempre sincero,

     Sempre giustissimo
     102Xe el so operar.
Ela a la gloria
     Salva i mortali;
     105Dal precipizio,
     Dai più gran fali,
     La virtù debole
     108La sa salvar.
Vedo Virginia
     Pretesa schiava;
     111Vedo el Decenviro
     Che za trionfava
     Su la so vitima
     114L'è per piombar,
L'è per destruzerghe
     L'onor, la gloria;
     117Ma ti, la vergine
     A la vitoria
     Dal vituperio
     120Ti sa' portar.
Chi mai de un Dario
     Là in Arabela,
     123La funestissima
     Iniqua stela
     Che lo perseguita
     126Chi sa placar?
Forse quei providi
     Celesti Numi,

     129Che tanti spasemi
     Che 'l pianto a fiumi
     Dei so' fioi miseri
     132No sa tocar?
Dal stato oribile
     De schiava vita;
     135Dal vituperio
     D'una sconfita
     Ti sola, o provida,
     138Ti 'l sa' sotrar.
E l'invincibile
     Che l'à desfato,
     141Per tanti secoli
     Chi è sta che à fato
     Grande e magnanimo,
     144Chi 'l fa onorar?
Ah! de la gloria
     Che lo iragiava
     147El lume vivido
     Za za oscurava
     Vizio e tiranica
     150Sè de regnar.
Se el nome celebre
     La fama spande;
     153Se quel Macedone
     Se chiama el Grande;
     Soto el to fulmine
     156Lo fa chiamar.

Quel pare misero
     Fra quatro fioli,
     159Che no gà un'anema
     Che lo consoli,
     Che le so lagreme
     162Xe el so disnar,
Che smunta e macera,
     Su quatro strazzi
     165Vede puerpera
     De tre regazzi
     L'infelicissima
     168Che lo sa amar,
Che va slanzandoghe
     In fra el sangioto
     171De le ochiae languide
     Senz'altro moto,
     Me par de vederlo
     174Morte a invocar,
Me par de vederte,
     Morte pietosa,
     177Gnente teribile,
     Gnente sdegnosa,
     Quei miserabili
     180A consolar.
Me par de vederte:
     Soto altro aspeto,
     183Sempre benefica,
     Giusta in efeto,

     La falce e 'l fulmine
     186Adoperar.
Vedo i Dionisi,
     Vedo i Neroni,
     189Vedo i Caligola
     Zozo dei troni
     Per ti la polvere
     192A morsegar.
Chi dai pestiferi,
     Chi ne purgava?
     195Forse el trifulmine
     Che i consacrava,
     E che intangibili
     198Ne i fa trovar?
Te onoro e venero,
     Divin Petrarca,
     201E dolci lagreme
     Spando su l'arca
     Che le to ceneri
     204Sa conservar;
Ma, oh Dio! perdonime,
     Perchè mai dirne:
     207Le più bel'anime
     La va a rapirne,
     Le triste e perfide
     210La sa salvar?»
Da la to Laura;
     Ti l'à pur vista,

     213Senza quel'orido
     Che la fa trista,
     Ti à sentio placida
     216Morte a parlar:
L'imparegiabile,
     La dona eleta,
     219Prima che istabile
     Fortuna meta
     Nel miel l'assenzio,
     222Vogio eternar.
Oh! quante Laure
     Che da fortuna
     225Sempre volubile
     Ne la laguna
     De tanti secoli
     228Ti à bu a sotrar!
L'ingiusto e 'l perfido
     Ti sola teme,
     231E al miserabile
     Che opresso zeme,
     Fa manco barbara
     234Sorte provar.
E là ne l'Erebo,
     Là ne l'Eliso,
     237Dove el reo crucia
     Da nu diviso,
     Dove se premia
     240Reto operar;

Per ti ne l'Erebo
     La colpa fioca;
     243Beatitudine
     Per ti ne toca,
     E un novo secolo
     246Ne fa trovar.
Dea potentissima,
     Solo conforto
     249De chi fra 'l turbine
     Sospira el porto,
     Benigna ascoltime,
     252No me sdegnar:
Sì, Dea teribile,
     Sì, dei mortali
     255Arbitra e despota,
     Tronca i mii mali,
     Ti, che ti domini
     258La tera e 'l mar.

---

Note

1. L'autore contempla la disorganizzazione fisica del corpo animale.