Indove me dol
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Plaustrum sacrum | Edission e fonte ▼ | Il Conclave nero → |
.jpg)
Solo il mio desiderio è senza fine.
Ariosto, XXV, 26.
DOPO disnàr giera montà in Parnaso
Dove che, solo senza alcun sospeto,
Spianava i soratàchi d'un soneto
Messo in forma per lori del Travaso,
E vorli vèdar co se dise el caso?
La pena la gavèa qualche difeto
E sicome, se sa, scrivo pocheto,
Cussì l'incïostro gavèa fato el taso.
Donca tiro la pena e... marameo!
La gera dura! Basta, xe sucesso
Che me son sbusà qua, come un babeo!
Gò dito un'ostreghèta, lo confesso,
Po gò introdoto in boca el sacro deo
E me lo son ciucià mi, da mi stesso.
Co sti preti i m'ha visto el deo fassà,
Per mostrarse devoti e svisserai
I gà fato un tremendo tananai,
Sbragiando ― oh, Dio, core, ch'el s'è copà! ―
I gà esposto el Santissimo e po i gà
Impizzà candelier, torzi, ferai,
I cantori à stonà da desperai
Finchè a l’archiatro i gà telefond;
E quelo sul momento el gà piantà
I clienti più minimi e de scarto,
E via per Borgo a gran velocità
El xe vegnuo che no'l gà messo un quarto,
Col forcipe, le fasse, el sublimà...
Forsi ch'el m'ha credesto in soraparto?
E mi gò dito ― Bona sera! adio...
El se senta ch'el gà corso abastanza,
Che sti preti se bùscara de Dio
E del Vicario suo per abondanza.
Che! No gò mal davanti nè da drio
E gò libaro el ventre de la panza,
Ma indove che me dol, Laponi mio,
El xe in ste legi nove de la Franza.
E co digo: Putei, come farogio?
Questo el dise refuda e quelo aceta,
Secondo l'ora che ghe fa el relogio.
Altro che foraura! El mondo aspeta,
Mi casco da un pastizzo int'un imbrogio...
Ah, Venezia, Venezia benedeta!