Il Conclave nero
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Indove me dol | Edission e fonte ▼ | Pensieri → |
.jpg)
Quoniam non est in ore eorum veritas: cor eorum vanum est.
Ps. V, 9.
I GESUITI i xe serai in Palazo
Che dà i voti segondo el so Statuto
E i ne refila col divin agiuto
El novo General, sia malegnazo.
Cossa vorli! No serve a far schiamazo
Se i Reverendi canta ogni minuto
Ch'el Papa negro xe paron de tuto
E che quel bianco non comanda un cavolo.
Se spera almen che al bianco no i ghe peta
De drio qualche serpente; uno de queli
Che gà la vocazion de la vendeta.
I xe boni, i xe bravi, i xe fedeli,
Ma co' me vedo in tola una polpeta,
Me viene in mente Papa Ganganeli.
Le sarà ben busie, ma co ve ciapa
Quel vecio roseghin de la paura
Tuti sa che per lege de natura
Anca una Guardia Nobile la scapa.
No podaria mò darse che anca al Papa
I ghe tramasse contro una congiura
E nel sacro ragù de la fritura
I ghe sgnacàsse un chilo de gialapa?
«I dise: ciò! che pensieri ridicoli:
Come? Sora la catedra apostolica
Se pol corer sta razza de pericoli?
E po', se ghe vegnisse un po' de colica,
No ghe serve la carta dei fassicoli
De la so cara Civiltà Catolica?»
Lori i scherza, ma mi parlo da seno
Che son omo maduro e de sperienza
E, la me creda, la gàbia pazienza,
Ste cosse vien co' se ghe pensa meno.
Ghe pensàveli lori a quel osseno
Sfrato da la so vecia residenza?
Cussì a mi pol vegnirme una sentenza
Drento d'una polpeta de veleno.
I dise el padre Fredi. Un Fredi giera
Za colonelo de giandarmeria
Soto Gregorio. Un pezzo de galera!
Povero mi se mai la Compagnia
Me piopa un general de quela schiera!...
Féme la guardia vù, Gesù e Maria!!