Plaustrum sacrum
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← F. I. A. T. | Edission e fonte ▼ | Indove me dol → |
.jpg)
Quasi turbo quadrigae eius.
Isai. LXVI, 15.
GALO visto che strazza de landò
Che gò esposto a Milan, che teramoto
Grando come un trabàcolo ciozòto,
Intagià de svolazi rococò?
Dentro el xe in seda de color ponsò,
Tutt'oro de zechini e sora e soto,
Con tre piàvoli a prova del casoto
E i penàci sul felze a do par do.
I papi che xe stai su quei cusini
No i gaveva malani a la scarsela
E i trovava contenti e molesini,
Ma mi piutosto me contentaria
Magari d'una ladra timonela,
Purchè de qua la me portasse via.
Lori andava una volta a gonfie vele
O se doleva al più ― chi sa perchè?
De le paterne vissare, che xe
Po' el stomego, la panza e le buele.
Ma mi che ghe sucedo in Israele
Invece tuto el mal lo gò nei piè!
Gò la podagra e a mi gnente cafè,
Dise Laponi, e gnente tagiadele.
Cussì tra la podagra e la preson,
Son deventà più negro d'un zudìo,
Rustico, tacabeghe e brontolon.
Fazzo un Silabo adesso a modo mio,
Volto a la barca de Piero el timon...
Machina indrio, putei, machina indrio!
E cussì la caroza che gò esposta
Xe un simbolo che dise pei mortali:
«Nu stemo sempre fermi tali e quali,
O, in caso, andemo da la parte oposta».
Per moverme de novo e andar in posta
No me manca el cochier, manca i cavali,
Se ben che, grazia Dio, tanti animali
I vol tirarme e i sbassa el colo aposta.
Deputai, magistrati e senatori
I xe qua pronti e lo gò tanto caro...
«El mio Papa e el mio Re!» Bis! bravo! fuori!!
E non saria po' gnanca un caso raro
Che sti piè li basasse i detentori...
Che miracoli el fa quel San Genaro!