Il Vangelo di S. Matteo volgarizzato in dialetto veneziano/Capo XV

Xonta lingambo
Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
[p. 59 modifica]
Capo XV.


ALORA se ga fato arente i Scribi, e i Farisei da Gerusaleme, e i ga dito:

2 Per cossa i to Apostoli gali mancà de osservar quel, che ga insegnà i vechi? Per cossa no i se lava le man co i magna?

3 Lu ga risposto: E vualtri per cossa disubidiu el comando de Dio, za che i ve lo ga insegnà? Perchè Dio ga dito:

4 Onora el pare e la mare, e: Chi maledirà el pare, o la mare, sarà castigà co la morte.

5 Ma vu altri disè: Tuti quei, che gavarà dito al pare, o a la mare: Podarè goderve coi mi regali:

6 E no gavarè conossuo, che xe dover de agiutar el pare, o la mare: col vostro esempio gavè distruto el comando de Dio.

7 Falsi che sè divoti; co ben che ga profetizà de vualtri Isaia, disendo:

8 Sto popolo me onora co la boca: ma el so cuor xe lontan da mi.

9 E i me onora senza rason, insegnando dotrina e comandi da omeni. [p. 60 modifica]

10 E chiamada davanti de lu la zente, el ga dito: Sentì, e scoltè.

11 No xe quelo, che intra in tela boca, che sporca l'omo: ma quelo, che vien fora da la boca, xe quelo, che fa deventar sporco.

12 Alora se ga fato arente i Apostoli, e i ga dito: No ti sa, che i Farisei, al to discorso, i s'ha scandalizà?

13 E lu rispondendo el ga dito: Quele piante, che no xe stae messe in tera da mio Pare, che xe in cielo, le sarà despiantae.

14 No ghe badè a lori: i xe orbi, e i mena i orbi. E se un orbo ghe ne mena un altro, i casca tuti do in tela fossa.

15 Piero alora ga chiapà la parola, e el ga dito: Spieghime sta parabola.

16 Ma lu ga dito: Vualtri seu anca adesso senza cervelo?

17 No intendè, che tuto quelo, che intra per la boca, passa in tela panza, e termina sortindo da de là per da drio?

18 Quelo, che sorte po da la boca, vien dal cuor, e questo sporca l'omo:

19 Perchè dal cuor vien i cativi pensieri, i mazza[p. 61 modifica]menti, el mancar de fede, el torse libertà co le done, el robar, i testimoni falsi, el dir mal del prossimo.

20 Queste xe le cosse, che machia l'omo. Ma el magnar senza lavarse le man, no disonora l'omo.

21 E co Gesù xe andà via da quel logo, el s'ha tirà da la parte de Tiro e de Sidon.

22 E alora una dona Cananea, saltada fora de quei contorni, la ga issà la ose, disendo: Pietà de mi, Signor, fio de Davide: la mia tosa xe assae tormentada dal diavolo.

23 Lu no ga dà indrio una parola. E i Apostoli s'ha fato arente de lu, e i lo ga pregà disendoghe: Cerca de cavartela datorno: perchè la ne ciga drio.

24 E lu ga riposto: No so sta mandà nome che per le piegore perse de la casa de Israel.

25 E la povera dona xe vegnua più vicin, e la s'ha butà inzenochion, disendo: Signor, agiutime.

26 E lu rispondendo el ga dito: No xe ben fato de portarghe via el pan de boca ai fioi, per butarghelo ai cani.

27 E ella, senza perderse, la ga risposto: Sia pur, Signor: ma de le volte anca i cagneti magna le fregole, che casca da la tola dei so paroni.

28 Gesù alora ga dito: Dona, xe granda la to fede: te [p. 62 modifica]sia pur dà quel, che ti vol. E da quel momento xe restada guaria la so tosa.

29 Co Gesù s'ha slontanà da quel logo, e el s'ha movesto da la banda del mar de Galilea: e andando suso de una montagna, là el s'ha sentà.

30 E una gran caterva de popolo ghe xe andada vicin, che menava muti, orbi, strupiai, e tanti altri malai: i ga fato, che i se buta ai so pie, e lu li ga guarii:

31 Onde la zente restava maravegiada al veder, che ai muti se ghe snodava la lengua, che i zoti moveva le gambe, che i orbi ghe vedeva: e i dava gloria al Dio de Israel.

32 Gesù po ga chiamà i so Apostoli, e el ga dito: Me fa peca sto popolo, perchè xe tre zorni, che no i se destaca da mi, e no i ga gnente da magnar: e no vogio, che i staga minga a dezun, perchè de le volte no li chiapa un svenimento per strada.

33 E i Apostoli ga dito: Ma da dove cavaremo nualtri in tun deserto tanti paneti da saziar sta bagatela de zente?

34 E Gesù ga dimandà: Quanti paneti gaveu? Lori ga risposto: Ghe n'avemo sete, e un pochi de pesseti.

35 E lu ga ordenà a tuta quela zente, che i se sentasse per tera. [p. 63 modifica]

36 E chiapai in man i sete paneti, e i pessi, e ringrazià, el li ga roti, e el ghe l'ha dai ai so Apostoli, e i Apostoli ghe li ga dai al popolo.

37 E tuti ga magnà, e i xe stai sazi. E i ga rancurà de tochi avanzai sete sportele piene.

38 Quei po, che gaveva magnà gera quatro miera de persone, senza i tosi e le done.

39 E licenziada tuta quele zente, el xe montà in tuna barca: e el xe andà in tei contorni de Magedan.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Il_Vangelo_di_S._Matteo_volgarizzato_in_dialetto_veneziano/Capo_XV&oldid=74627"