Il Vangelo di S. Matteo volgarizzato in dialetto veneziano/Capo XVI
|
Edission original: | |
|
Fonte: |
| ← Capo XV | Edission e fonte ▼ | Capo XVII → |
I FARISEI, e i Saducei xe andai a catarlo per stucegarlo: e i l'ha pregà de farghe veder dei miracoli dal cielo.
2 Elu ga risposto: Vualtri disè de sera: Che farà bon tempo, perchè el cielo buta rosso.
3 E de matina: Ancuo sarà un gran temporal, perchè el cielo scuro se fa rosso.
4 Vu savè donca capir le cambianze del cielo: e no sè capaci po de capir i segnali dei tempi? Razza bricona e bastarda la cerca un miracolo: e no i ghe ne farà altri, che quelo de Giona profeta. E voltandoghe a costori le spale, el li ga là impiantai.
5 E i so Apostoli passando de là dal lago, i s'avea desmentegà de tor su del pan.
6 E Gesù ga dito: Tegnì averti i ochi, e vardeve dal levà dei Farisei e dei Saducei.
7 E i stava pensierosi, e drento de lori i diseva: No gavemo tolto gnanca del pan.
8 Gesù, che li ga capii, el ga dimandà: Per cossa steu drento de vualtri cussì pensierosi, zente de poca fede, perchè no gavè un poco de pan?
9 No metè ancora pensier, nè ve recordè dei cinque paneti per i cinque miera de omeni, e quante misure ghe n'avè rancurà?
10 Nè gnanca dei sete paneti per i quatro miera de omeni, e quante sportele, che ghe n'avè sunà suso?
11 E no intendè, che mi no v'ho minga dito per l'afar del pan: Che ve vardè dal levà dei Farisei e dei Saducei?
12 Alora si che i ga intendesto, che nol gaveva minga dito de vardarse dal levà del pan, ma de quel, che insegna i Farisei e i Saducei.
13 Gesù po col ga tirà da le bande de Cesarea de Filipo el ga domandà ai so Apostoli: Chi dise i omeni, che sia el Fio de l'omo?
14 Lori ga risposto: Ghe xe chi dise, ch'el xe Zuane Batista, chi lo vol Elia, chi se pensa, ch'el sia Geremia, o qualchedun altro dei profeti.
15 Gesù ga replicà: E vualtri chi diseu, che mi sia?
16 Simon Piero ga risposto: Ti ti xe Cristo, fio de Dio vivo.
17 E Gesù cussì ga parlà: Ti xe beato, Simon BarJona: perchè no te ga fato saver chi so, nè la carne, nè gnanca el sangue, ma nome che mio Pare, che xe là in cielo.
18 E mi adesso digo a ti, che ti xe Piero, e sora de sta piera tirerò su la mia chiesa, e la baterà duro anca contro le porte de l'inferno.
19 E a ti te darò la chiave del regno, che xe in cielo. E quele cosse, che ti gaverà ligà sora la tera, le sarà ligae anca in cielo: e quele cose, che ti gaverà dessolae sora la tera, le sarà dessolae anca in cielo.
20 El ga ordenà ai so Apostoli, che no i disesse gnente a nissun, che lu fusse Gesù Cristo.
21 Da quela volta in qua Gesù ga scomenzà a insegnarghe ai so Apostoli, in che maniera bisognava, che lu andasse a Gerusaleme, che là el patisse tante cosse dai vechi, e dai Scribi, e dai capurioni dei preti, e ch'el fusse anca morto, e el ressussitasse el terzo zorno.
22 E Piero chiapandolo da parte, el ga scomenzà a lamentarse disendoghe: Signor, no sarà mai dito vero, che te nassa a ti una cossa simile.
23 E voltà da Piero, el ga dito: Marchia via da mi, diavolo; ti me xe de scandalo: perchè no ti ga el saver de Dio, ma quelo dej omeni.
24 Alora Gesù ga dito ai so Apostoli: Chi vol vegnir co mi, bisogna, che el se desmentega de lu; el ga da tor su la crose, e yegnirme drio.
25 Perché chi gaverà vogia de salvar la so anema, la perderà: e chi perderà la so anema per amor mio, la catarà.
26 Cossa ghe conta a l'omo de guadagnar tuto el mondo, se po el perde l'anema? Cossa daralo l'omo per l'anema soa?
27 El Fio de l'omo vegnirà in tela gloria de so Pare coi so anzoli: e alora el ghe darà el soo a tuti secondo che i s'averà portà in sta tera.
28 In verità ve digo, che fra colori, che xe qua adesso, ghe xe de queli, che no morirà, avanti che i veda el Fio de l'omo meter el pie drento del so regno.