Il Porco
|
Edission original: |
Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 12.djvu |
| Edission e fonte ▼ |
A Mestre un benestante
Un belissimo Porco avea arlevà
Che gera de grandezza esorbitante.
Un certo so' vicin, che avea osservà
5Sto famoso anemal,
Ga dito un dì a sto tal:
Compare, avè un Porcelo
Che xe una maravegia, grasso e belo.
Ma l'altro ga risposto: Amigo mio,
10Cossa serve che belo e grasso el sia
Se quando lo averò distribuìo,
La manco parte la sarà la mia?
A mie sorele Muneghe
Ghe ne vol una parte, un'altra al Medego,
15Un'altra a sior Piovan,
Un'altra a mio Zerman,
Un'altra a mia Cugnada;
E po roba salada
Da dar a questo a quelo;
20Cussichè posso dir: Adio Porcelo.
Se savesse trovar qualche pretesto
Per scansarme da tuti, oh ve protesto
Che molto volentiera lo farìa,
E tuto quanto mì lo magnerìa.
25L'amigo ga sogiunto: Donca mì
V'insegnarò el secreto; fe cussì;
Via da de qua mandèlo,
E a chi domanda: Dov'è andà el Porcelo?
Diseghe: El me xe stà
30L'altra note robà,
E cussì sarè esente
D'averghe da dar gnente.
Bravo! sior sì, pulito,
(Quelo dal Porco à dito)
35Me piase l'invenzion
E darò a sto recordo esecuzion.
Ma ne la note drio da la so' zente
L'amigo del consulto bravamente
Ghe lo à fato robar,
40E in un paese più lontan mandar.
Co la matina è stada,
I s'à incontrà un e l'altro su la strada,
E quelo dal Porcelo
À dito a l'altro: No savè, fradelo,
45Che i m'à robà da seno el Temporal?
Co la boca ridente
Ga l'amigo risposto: Tal e qual
Avè da far aponto co la zente.
El primo mo zurava e sperzurava
50Ch'el Temporal, pur troppo, ghe mancava.
Stralassè de zurar,
À replicà el secondo, che l'afar
So anca mi come l'è, che, amigo mio,
Son quel ch'el stratagema à sugerìo;
55Peraltro questo è 'l modo
De far parer che vu parlè sul sodo.
À tornà da recao quel dal Porcelo
A replicar: Credèlo,
No la xe un'invenzion, la è tropo vera,
60I m'à robà el Porcel geri de sera.
E l'altro à replicà medemamente:
Bravo, amigo, ma bravo veramente,
Seguitè pur cussì, che ve protesto
Per vero el caso vegnarà credesto.
65Tornava el primo a protestar zurando,
Ma st'altro alora è corso via ridando.
Pol la fiaba avertir,
Non ti fidar che non sarai gabbato,
Ma la pol anca dir:
70Chi cerca d'ingannar resta ingannato.