I va in Merica

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
I va in Merica
1897
Edission e fonte ▼

Fulminadi da un fraco de tempesta,
l’erba dei prè par ‘na metà passìa
brusà le vigne de la malatia
4che no lassa i vilani mai de pèsta;

ipotecado tuto quel che resta,
col formento che val ‘na carestia,
ogni paese el g’à la so angonia
8e le fameie un pelagroso a testa!

Crepà la vaca che dasea el formaio,
morta la dona a partorir ‘na fiola,
11protestà le cambiale del notaio,

una festa, seradi a l’ostaria,
co un gran pugno batù sora la tola:
14“Porca Italia” i bastiema: “ andremo via!

”E i se conta in fra tuti. – In quanti sio?
- Apena diese, che pol far strapasso;
el resto done co i putini in brasso,
18el resto, veci e puteleti a drio.

Ma a star qua, no se magna no, par dio,
bisognerà pur farlo sto gran passo,
se l’inverno el ne capita col giasso,
22pori nualtri, el ghe ne fa un desìo!

Drento l’Otobre, carghi de fagoti,
dopo aver dito mal de tuti i siori,
25dopo aver fusilà tri quatro goti;

co la testa sbarlota, imbriagada,
i se da du struconi in tra de lori,
28e tontonando i ciapa su la strada!