Pagina:Berto Barbarani, I due canzonieri, 1917.pdf/77

I VA IN MERICA.

I.

     Fulminadi da un fraco de tempesta,
l'erba dei prè par 'na metà passìa,¹
brusà le vigne da la malatia
che no lassa i vilani mai de pèsta;

     ipotecado tuto quel che resta,
col formento che val 'na carestia,
ogni paese el g'à la so angonia
e le fameie un pelagroso a testa!

     Crepà la vaca che dasea el formaio,
morta la dona a partorir 'na fiola,
protestà le cambiale dal notaio,

     una festa, seradi a l'ostaria,
co un gran pugno batù sora la tola:
«Porca Italia» i bastiema: «andemo via!»

1. passìa: appassita.