Andando a letto
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Udienza privata | Edission e fonte ▼ | I pelegrini → |
COME? El xe de servizio, sior Marchese?
Bravo! El me conta su qualche storiela.
Ghè de le novità nel so paese?
Lori i gà ancora in piè la so Asinela,
Ma el nostro campaniel... Basta! e i ghe mete
L'aseno ancora ne la mortadela?
Un ano fa, ghe n'ò magnà do fete,
Ma el sospeto de l'aseno, de' Diana!
Me giazza e preferisso le polpete.
Come? I gà l'elezion sta setimana?
Spero ben che riessa i candidai
De la Ciesa Apostolega Romana.
Sì, capisso anca mi; no se sà mai!
Ma se i vol trionfar co la so lista,
Che i fazza el pato con i moderai.
Oh, li cognosso, salo! A prima vista
I par zente devota al so prinzipio,
Patriotti sinceri e moralista;
In piazza i portarà l'elmo de Sipio.
Ma tra de lori i porta anca el tricorno,
Basta che i possa andar in Municipio.
Co i gà bisogno e i ne vien da torno
I se piega, i se rampega, i se mola
E ai so prenzìpi no i ghe tende un corno.
E' i Gesuiti che gà fato scola,
E i gà insegnà che quando torna el conto,
Aseno chi mantien la so parola.
A dirghe Giuda no xè farghe afronto!
Ma che unità, che patria o zuramento!
I core solo drio a l'odor de l'onto.
Vedelo, caro? Mezo Parlamento
Core in fila a basar el piè santissimo
E il mio Papa e il mio Re xè el so argomento.
La se pol dunque figurar benissimo
Se no i core a votar come un sol prete
In onor de la Ciesa e de l'Altissimo!
Quela xè zente che se sotomete
Se i gà interesse! Xelo persuaso?
Bravo! Alora el me cava le calzete.
Grazie, Marchese, e la me slonga el vaso!