I molini de l'Adese

by Vittorio Vitturi

3 I molini de l'Adese Strade e vicoli Biancaria al sol Carlota Aschieri Vittorio Vitturi 1907 XX Poesie veronese

Indice:Strade e vicoli.djvu

Vittorio Vitturi ―  Strade e vicoli

I molini de l'Adese

1907

Edission original:	Vittorio Vitturi, Strade e vicoli, Rime veronesi, Verona, Fratelli Drucker editori, 1907
Fonte:	Indice:Strade e vicoli.djvu

←  Biancaria al sol

Edission e fonte ▼

Carlota Aschieri  →

I MOLINI DE L’ADESE

INTERLOCUTORI

Dal'Oca Bianca - Voce da l’Adese ― Voce dal Gheto

Voce da le Arche Scaligere

Dal'Oca

(fermo, impalà, sul Ponte Umberto)

     Le cose vece e bele col tempo le va via
E quando che ghe penso me vien malinconia!
'Na volta in tuto l’Àdese se masenava^[1] el gran
Da far la polentina, le paparele,^[2] el pan...

Voce da l’Adese

     E alora i molinari^[3] — c’elo che no lo sa? —
I era gente de polso, che i g'avèa fin la Bra!^[4]

Dal'Oca

     Ghe n'era de i molini, che n'era tanti e bei,
Ma adesso, a pena, a pena, se i conta sora i dei;
Ah, che bel colpo d’ocio, ste case su i barconi
Con l’àcqua che le scorla,^[5] che rusa frai rudoni,
Con quel sfondo de ponti e case e montesei
Tuti pieni de verde, de mure, de castei...

E sora a tuto un ciel, un ciel, che, busarona!^[6]
L’è quel che mi pituro, quel de la me Verona.
Par mi ste cose vece, le g'à ’na poesia
Che intanto che le fisso la mente me va via!...

Voce da l'Adese

     Se i tol i molini
— Sti gran masenini —^[7]
El nostro Dal’Oca
De qua el se la moca,^[8]
El brusa i penei,
El perde i cavei,
E adio sto pitor
De tanto valor.

Voce dal Gheto

     Savì che rabiade,
Savì che infuriade,
Par via del progeto
Sifato del Gheto....^[9]

Voce da le Arche

     Savì che infuriade
Nel vedar sgrafade^[10]
Da serti profani
Le Tombe de i Cani!^[11]

Dal’Oca

     Oh, no, restè molini,
Magari in pochetini,
Che un Àdese più bel
No trovè soto el ciel...

Voce da l'Adese

     E un pitor meio al mondo
No gh’è del nostro biondo!

---

Note

1. [p. 102]Masenava: macinava
2. [p. 102]paparele: tagliatelle
3. [p. 102]molinari: mugnai
4. [p. 102]polso: danarosi [p. 103]de i molinari; noto sito vicino al Liceo
5. [p. 103]scorla: scuote
6. [p. 103]busarona!: esclamazione di maraviglia
7. [p. 103]masenini: macinini
8. [p. 103]moca: fugge
9. [p. 103]Gheto: allusione alle polemiche sostenute dal Dall’Oca per la conservazione delle case del Ghetto
10. [p. 103]Sgrafade: graffiate
11. [p. 103]Tombe de i Cani: Tombe degli Scaligeri; altra allusione alle polemiche per il restauro delle dette tombe.