Eviva el prà
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← Cantada de magio | Edission e fonte ▼ | Vuto no? Vuto sì? → |
L'è verde el prà! Me sento in te le recie
i grì de i grigi,1 così negri e bei:
queste, Nineta, i è cansone vecie,
che se tol su da quando s'è putei,
ma le cansone vecie no va via,
più se le scolta, più se scoltaria...
E su l'erba l'è tuta una rosada,
e drento al prà l'è tuta una cantada,
e grii, fa el grio,
e grii, fa el cor...
Vegni Nineta, col nome de Dio:
gh'è ne l'erba l'amor
che ne fa strada!
Eviva el prà! Se ti, con mi te vegni,
te conto la rosaria2 de la luna,
e po' te donarò (se te te degni)
un gobeto de quei de la fortuna,
un gobeto de quei che g'à do gobe,
che te porta un vagon de bele robe!...
E su l'erba l'è tuta una rosada,
e drento al prà l'è tuta una cantada,
e grii, fa el grio,
e grii, fa el cor...
Vegni Nineta, col nome de Dio,
gh'è ne l'erba l'amor
che ne fa strada!
- Note