El Bartoldo
Edission original: |
Berto Barbarani, I sogni, 3° Canzoniere, Verona, Mondadori, 1922 |
Fonte: |
← Custosa | Edission e fonte ▼ | CONGEDO — L'ULTIMA LEVA → |
(SAGGIO)
Al tempo che Alboin re de Verona,
tegnea le corte[1] su a Castel San Piero,
e l'Adese el girava a la carlona,
strassinando da mato el so poliero,[2]
vol che da i bagni caldi de Caldiero[3]
dopo de aver ben bastonà la dona,[4]
el Bartoldo vilan fasesse viaio
co un quarel de polenta e del formaio!
Gh'era in aria un cìo cìo de primavera,
che meteva in boresso tuti quanti;
ci vestiva una giaca più ligiera
e ci andava descalsi e sensa guanti;
i albari metea fiori galanti,
su i castei sventolava la bandiera,
e Bartoldo anca lu come da un vaso,
butava fora brufoli[5] sul naso...
Par combinar la ghigna de sto omo,
ah! no convien 'conomisar parole,
che çerti mostri sul portal del Domo,
j-era in confronto suo gropi de viole;
la so pele parea fata a spongìole
che j-è quei fonghi che vien zò da Como,
e le mane bison che te le cubi[6]
al bruschineto che se neta i tubi...[7]
La so testa sonèa[8] la piassè grossa
bocia de anguria mal maurada in tera,
che la porta le plache de la lossa.[9]
Do gran recione a la carabiniera
sora un naso girevole a cerniera
e 'na bocassa che faseva angossa:
oci de fogo, segie[10] de pel mato,
eco Bartoldo e 'l so più bel ritrato!
E pur drento a sta anima vilana
scolpida da un birbante de scultor,
gh'era un vagon de inteligensa sana,
insucarà de spirito inventor —
che anca davanti a un re, a un imperator,
ben o mal che sonasse la campana,
el Bartoldo vilan, ma furbo e forte
l'era bon de zugar galine e corte!
L'era la corte un gran palasso a giorno
sul genere de quei che i fa in confeti:
lôse e giardini ghe girava atorno
su colonete traforade e archeti,
da dove sventolando i fassoleti
quando qualche guerier sonando el corno,
se lo vedea passar arme e bandiera
sul marciapiè del ponte dela Piera...[11]
- Note a cura de l'autor
- ↑ le corte: la reggia
- ↑ poliero: puledro
- ↑ Le antiche terme romane di Giunone a sei miglia da Verona sulla via Vicentina.
- ↑ dona: moglie.
- ↑ brufoli: foruncoli
- ↑ che te le cubi: che le paragoni
- ↑ tubi: i tubi della lucerna.
- ↑ sonèa: sembrava
- ↑ lossa: terra umida
- ↑ segie: ciglia
- ↑ Ponte romano sotto il Castel San Pietro.