Contemplazione
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← In segreto | Edission e fonte ▼ | Musica → |
![](http://upload.wikimedia.org/wikipedia/commons/thumb/b/bb/Le_Ci%C3%A0cole_de_Bepi%2C_Roma_1908_%28page_68_crop%29.jpg/400px-Le_Ci%C3%A0cole_de_Bepi%2C_Roma_1908_%28page_68_crop%29.jpg)
Come falso veder bestia quand'ombra.
Dante, Inf. II, 44.
PUTEI, vegnime avanti
E ve farò saver
Che in grazia del mestier
Fabrico i Santi.
Chi lo gavesse dito
Quando che da bambin
Stregiava el somarin
Cussì pulito!
Basta! Mi giera drìo
A fabricarne un pér,
Quando el zerimonier
Strila — per Zio!
Ciò — digo ― cossa galo?
Ma lu el restava là
In estasi, piantà
Pezo de un palo.
Alora il guardo io ziro
E vedo in t'un canton
Do siori in zenocion....
Stele, che miro!
E ben che degli erori
Ne fazzo in quantità,
Gò visto in verità
Che i giera... Lori! 1
Alora internamente
Gò ringrazià el Signor
Che gà tocà nel cor
Sta bona zente.
E ben che zà savémo
Che finirà cussì,
Gò dito tra de mi:
Bepi, ghe semo!
So mi dove la bate!
Anzi, per non falar,
Gò fato soletar
Massa zavate.
I ghe n'ha tanta vogia
Ma i se vergogna un po'
E i stenta, ma mi gò
Magnà la fogia.
Che bel momento, aseo!
Xe tempo de imitar
La siora Putifar,
No Bepi ebreo!
Tira una bavesela
De vera contrinzion
Che xe el momento bon
De issar la vela.
Le cose andava zope,
Ma, dopo el bordezar,
Scomenzo a navegar
Col vento in pope.
Ancuo démoghe a questo
La santa asoluzion:
Vegnarà po el paron
Con tuto el resto,
Cussì col nostro ingegno,
Fra mi e Mery del Val,
Spuando el Temporal
Magnemo el Regno;
E, i dise i camarieri,
Che presto marciarò
Per Roma, in t'un landò
Coi corazieri.
I povari Ministri,
Se ghe ne sarà più,
Coi Padri de Gesù
Farà i registri.
E alora el Parlamento
Averzerà el porton
Dopo una prossession
Col Sacramento,
Perchè, per le segrete
Sentenze del Signor,
Soto un conservator
Ghè sempre un prete,
Basta; se vedaremo,
Che adesso gò de là
Don Longo e un deputà....
Ocio! Ghe semo!!
- Note
- ↑ NOTA ― Le gièra do Altese e la gà dito massa paternostri, ma quanto a vegnir suso... gnente! I se vergogna un poco.