Musica
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Contemplazione | Edission e fonte ▼ | Ancora l'onomastico → |
.jpg)
Sumite psalmum et date tympanum.
Psal. LXXX, 3.
SAVÈU, putèi? Ste Guardie Palatine
Co le gà visto che no me diverto,
E che in musica gò le 'recie fine,
M'ha fato la sorpresa d'un concerto,
Sorpresa... ecco, dirò... de' miei parenti,
Perchè da un ano gò pagà i strumenti.
Ma intanto, el zorno che compisso i ani,
I gà sonà in zardin del Belveder
E, povareti, in fondo no i xe cani,
Anzi, digo, i ma gà fato piaser
Perchè invece de quei requiem eterna,
Go sentio tuta musica moderna.
Go sentio mironorma e quela pira
E po' quanto bacan per la cità;
Deh perdona ad un padre che delira,
Lucia, funicoli funicolà
E tanti capi d'opara famosi
Che xe restà persino Don Perosi,
E alora son partio da sto prinzipio:
Che la banda no basta de sentirla,
Ma che quando la smete el Munizìpio
Toca a la Santa Chiesa a mantegnirla
E se 'l Comun, po', la volesse a nolo,
Che i diga quel che i vol, mi ghe la molo.
La banda! Ah, me recordo quele sere
Quando in Piaza San Marco, sul liston,
Ghe giera un mar de fiame e de lumiere
E tuto un mondo de popolazion,
Un monte de foresti e veneziani
Che vegniva a sentir sonar l'Ernani!
La bavesela che vegnia dal Lido,
Salsa e odorosa, ralegrava el cor,
Mentre i colombi desmissiài nel nido
Tornava in quela luse a far l'amor,
E i morosì, sior sì, parlava pian
Ai tavoli de Quadri o de Florian.
I toscani diseva: oh, qual beltà!
Ei milanesi: guarda che sproposet!
I tedeschi: tartaifel, schoenes, ja!
E i inglesi: by Good, yes, watercloset!
Che nel dialeto de le so famegie
Significa: varè che maravegie!
E me recordo, me recordo pur
De quele sere alegre e benedete
Quando vegniva Romanin Jacur
E ziogavimo el solito tresete...
Quelo el gaveva la fortuna in pope!
Sempre tre assi e napola de cope!
Basta, putei, no ghe pensemo più,
Se no me magna la malinconia.
Sia fato sempre quel che vol Gesù.
Scordemose Venezia e cussì sia;
Ma la xe dura tribolar cussì
Per via dei Padri... che m'intendo mi.
Pazienza! Se lo vol Dio che comanda,
Zupeghemose almen sto po' de svago
E sentimo in zardin sonar la banda,
Tanto più che son mi che me la pago
E se i stona, pensé, povari fioi,
Che infallibil no semo altro che Noi.
Fra poco vien Guglielmo in Vatican
Che ghe vogio più ben che no al pan fresco
E ben ch'el sia, purtropo, luteran,
Ghe faremo sonar l'ino tedesco,
Cussì el Governo e quelo che detiene
I deve biassâr tossego e caéne.
E adesso, atenti! No ghe miga mal,
Ma quela de Venezia xe più megio.
Ah, sto pezzo el xe novo e original,
Musica, zerto, de un maestro egregio.
Forse de Mustafà? Me par de no...
Ah, go capio! La xe madam Ango!