Dies illa
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← Il bagno | Edission e fonte ▼ | Anniversario → |
![](http://upload.wikimedia.org/wikipedia/commons/thumb/a/a4/Le_Ci%C3%A0cole_de_Bepi%2C_Roma_1908_%28page_127_crop%29.jpg/400px-Le_Ci%C3%A0cole_de_Bepi%2C_Roma_1908_%28page_127_crop%29.jpg)
Ierem. XII, 7.
VOGAVA la gondola
A pian, soto i ponti de piera,
Strissando nel palido
Turchin de la tepida sera.
Nel ciel senza nuvole
Spuntava tremando le stele
E i mozzi dai alberi,
Nel porto, calava le vele.
Volando zò rapidi
Tornava da tera i colombi
Ai noti ricovari,
Ai nidi che dorme sui Piombi.
Traverso le lagreme
Le cose cambiava figura,
Spariva le fabriche,
La sera calava za scura.
E un'eco de musica
Lontana, su l'acqua cantava...
La gondola rapida
Ne l'ombra dei ponti vogava,
Vogava portandome
Al treno che 'l stava sbufando
E i òci de l'anema
Vardava e pianzeva, passando.
Adio, cara gondola,
Legiera al comando del remo,
Adio, ponti cogniti!
Chi sa se mai più se vedemo? —
Adio, verdi e libare
Pianure de Brenta e de Piave...
Varè con che spasemo
Che vado a serarme in Conclave!
Ma in Roma, ne l'intimo
Pensier, una ' ose sentivo:
― Venezia desmentega!
De qua no te sorti più vivo! —
La 'ose profetica
Purtropo gà colto nel vero
Che i m'ha messo in cattedra,
O in crose, compagno a San Piero.
La sente? Sui cardeni
Se sera stridendo le porte...
Le porte del carzere
Che averze soltanto la morte!