Ventiquattro Odi Scelte di Orazio Flacco/10

by Pietro Bussolin

ODE II. LIBRO IV. ODE X. LIBRO II.

ODE XXVI. LIBRO III.

Pietro Bussolin

Ventiquattro Odi Scelte di Orazio Flacco
tradotte liberamente in verso e dialetto veneziano

ODE II. LIBRO IV.

1832

Edission original:	Bartolommeo Gamba, Serie degli scritti impressi in dialetto veneziano, compilata ed illustrata da Bartolommeo Gamba, giuntevi alcune odi di Orazio tradotte da Pietro Bussolin, Venezia, dalla tipografia di Alvisopoli, 1832
Fonte:	Indice:Serie degli scritti impressi in dialetto veneziano.djvu

←  ODE X. LIBRO II.

Edission e fonte ▼

ODE XXVI. LIBRO III.  →

Ode II. Libro IV.

Pindarum quisquis studet aemulari
Jule, ceratis ope Daedalea.

A GIULIO M. ANTONIO¹

Mostra quanto sia pericoloso el voler
imitar i celebri Poeti; e, fra
i altri, Pindaro.

Giùlio caro diletissimo,
     Chi volesse star a pèto
     Del gran Pindaro famoso,²
     Farìa un fiasco vergognoso,
     5Come à fato Icaro un dì.
L'è un torènte de i teribili

Che ingrossà da le gran piòve,
     Zò da i monti vien a basso,
     E co' fùria e gran fracasso
     10Sboca fòra dove el vol.
Cento e più corone el merita,
     Sia ch'el canta in varï metri
     Quei so' versi, che par strambi
     Ma che xè bei ditirambi
     15Fati in lode del bon vin;
Sia che i Numi in cielo el cèlebra,
     O, quei bravi semidèi
     Che i Centàuri à schizzà in tera,
     O, chi à vinto la chimèra
     20Co' quel strazzo de valor;
L'è stragrando s'el determina
     De lodar chi à bùo la palma
     Ne le lòte, o ne le corse,
     E i so' versi (senza el forse)
     25Più che marmi e bronzi i val;
E se a qualche bèla zovene
     Ghe xè morto so' marìo,
     In tal modo el la consola,
     Che ghe par che a restar sola
     30Nol sia tanto un gran dolor;
Che se inoltre el canta i meriti
     De quel povero so' sposo,
     Tuti dise; che quel morto
     No xè morto, ma resòrto,
     35E per sempre imortalà.
Sempre ò dito, caro Giulïo,
     Che co' Pindaro và in alto
     Per destender le so' ale
     El gà un vento drìo le spàle,

     40Che lo spenze sempre in sù;
E mi' in vece, picolissimo,
     Stàgo a basso, come l'ava,
     E me scondo in t'i boschèti,
     Supegando de i fiorèti
     45Per dar fòra un fià de miel;
Ma sti cibi cussì languidi
     Porta drìo la conseguenza,
     Che i mï versi no gà lena,
     E che ocòre un'altra vena
     50Per chi in alto vol svolar.
Toca a tì, cantar d'un Cesare
     Quando in Roma pien d'alòri,
     Seguità da i so' soldài,
     Co i Sicambri sogiogài³
     55Tornarà quà vincitor;
Sì, quel dono distintissimo,
     Che n'à fato i santi Numi,
     E che un simile tesoro,
     Se tornasse l'età d'oro,
     60Mai al mondo vegnirà;
Descrivendo le baldorie,
     E le publiche alegrèzze
     Decretae per quel bel zorno
     Che sarà quà de ritorno
     65Quel eròe tanto bramà.
E anca mì, se sarà lecito,
     Dirò a zonta: O sol benigno
     Che l'Augusto ti ne rendi,
     Quanto, ancùo, più ti resplendi
     70Perchè tuto vada ben!

I to' eviva ai mï d'acordo,
     Oltre a quei de tuta Roma,
     Nel trïonfo sentiremo,
     E po' a i Numi brusarèmo
     75De l'incenso in quantità.
Per ti ocòre al sacrifizïo
     Dièse manze e dièse tòri,
     E a mì basta solamente
     Quel vedèlo che al presente
     80Stà magnando l'erba in prà;
Deslatà che xè pochissimo,
     Co i cornèti in su voltài,
     Che par queli de la Luna,
     Senza màchie, for che una,
     85E in tel resto, formentin.⁴

---

Note a cura de l'autor

1. Sto Toni Giulio giera fio de Marco Antonio Triumviro, bravo scritor e amigo distinto de Orazio.
2. Pindaro, famosissimo poeta lirico, se pol dir portentoso, greco de nassita; la so' patria xè Tebe.
3. Popoli che abitava quèla parte de la Germania che se ghe dise Gheldria.
4. Formentin xè el più comun color de i vedèli; e naturalmente el fulvus de Orazio.