Un ragazzo ridicolo per el so vestito
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← El zogo de fragna | Edission e fonte ▼ | El pentimento de la Madalena → |
.jpg)
(Su un disegno di E. Bosa, che rappresenta due ragazzi del popolo in atto di aizzare un cane contro un terzo ragazzo beffeggiato, perchè vestito di abiti larghi non adattati al suo dosso, dei quali andava pomposo.)
Varda che abiti!
I fa per tre
Chiapilo, chiapilo,
Su ee, su ee.
Presto imbotonite,
Tiente incrosà,
Se no quei abiti
Te scamperà.
E quela sgnesola
De capelon!
Xe da incalcarghelo
Co un pignaton.
Xela una boria!
Chi mai ghe pol?
O che lustrissimo
Da strazzarol!
Deghe la bagia,
Bu bu, bu bu;
Chiapilo, chiapilo,
Su, Fido, su. —
Cussì fa bagolo
Quei do col can
De colù in mascara
Da cortesan.
Fin co quei abiti
Che i ga imprestà,
O forsi el santolo
Ga regalà,
Imaginandose
D'esser un sior,
Ghe vien dei refoli,
Ghe boge el cuor.
E vergognandose
De farse star,
Tanto de memini
L'è per molar.
Ma gh'è a le pupole
Sbragiando el can,
E za el coragio
Ghe cala in man.
Come difenderse?
Un contro tre:
Povaro diavolo!
Fufa là xe.
A naso el spasemo
Ga za operà:
No ghe xe equivoco
El s'à sporcà.
― Questa xe... ecetera,
Che spuza! puh!
Chiapilo, chiapilo,
Su, Fido, su. —
I lo perseguita
Fs, el la ga,
El xe el baronzolo
De la cità.
Dopo la favola
Vien la moral;
Ecola semplice
E natural.
Oh! quanti stolidi
Che se dà ton,
Credendo un merito
L'abito bon!
Senza un intrinseco
No gh'è valor,
Nè basta l'abito
Per farse onor.
Anzi la smania
De figurar
Spesso ridicolo
Fa deventar.
E se del publico
No se 'l balon,
Come quel mamara
De capelon,
Xe che la critica
De società
Da drio ve petena
Per civiltà.
.jpg)