Un orto poareto
|
Edission original: |
Giovanni Ceriotto, Poesie veronesi, Seconda edizione accresciuta, Verona, Remigio Cabianca editore, 1911 |
|
Fonte: |
| ← In strada | Edission e fonte ▼ | Poesia e bicicleta → |
'Na sesa1 la ghe gira intorno magra,
butado là par caso, canta un grio,2
'na suca in t'un canton l'è stufa e agra,3
de védar rati che so core a drio.4
'Na galina con tanto de pelagra,
par no sporcarse la se tira in drio,5
con du versoti marsi la fa sagra,
la serca un bisso e la de trova un nio.6
Da 'na finestra, un vecio rapolado,
che via de lu no capita nissuno,
el guarda lì un fìgar tuto malado,
che 'l buta i fighi se ghe par a lu;
quando l'è magro el ghe ne buta uno,
quando l'è grasso, forsi, forsi, du.
E se càpita in zo quel tempo storto,
che tocando le foie par de sora,
el ghe dise a pianin: «movive fora,
lassè la casa che con mi ve porto;»
el figar, povareto l'è za morto,
la galina l'è andada za in malora,
la sesa forsi la te dise ancora:
«qua, un giorno, desparado gh'era un orto!...»
Fioca; e contenti i oseleti i core
a spartirse la neve che no sfama,
po' zugando i se ciama e i se discore;
ma fermandose sora a qualche rama,
el par che i voia dir: «fe7 a pian che i ciama,
tasì, tasì,8 che gh'è un orto che more!...»
- Note