Un inoçente
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Un fato de sangue | Edission e fonte ▼ | Un studente in siopero → |
Un bel zorno a sior Quagioto
se presenta un çerto Tizio,
domandando s'el voleva
torlo subito al servizio.
― Volentieri che ve togo, —
dixe alora sior Quagioto,
— ma lassème che domanda
— se sie' un bravo zovenoto. —
«Sior paron, no gh'è bisogno
» ch'el domanda informazion,»
salta suso a dir quel Tizio,
» so de i omeni el più bon;
» quatro aneti de galera
» go ciapà 'na volta sola...
ma inoçente come l'aqua,
» posso darghene parola.»
Sior Quagioto, furibondo
da una simile risposta,
no sa più se Tizio diga
seriamente opur aposta;
ma sogiunge alora l'altro:
» Cossa vorlo, sior paron,
» go robà da un negoziante
» quatro metri de cordon.»
― Come mai? per quatro metri
— de cordon i v'ha cazzà
― una simile condana? —
ga Quagioto domandà.
» Ghe assicuro che no i gera
» più de quatro, ma però
» su la çima, me so acorto,
» che ligà ghe gera un bò.»