Un fato de sangue
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Un creditor | Edission e fonte ▼ | Un inoçente → |
— Mio Dio, che spavento
— che go stamatina! —
corendo, la Cate
ghe dixe a Rosina.
«Che diavolo gastu
» cussì scalmanada?
» camina, no stemo
» qua in mezo la strada.»
— So qua che me trema
— perfin i zenoci;
— che sena tremenda
— ga visto sti oci! —
«Mi qua, go un calmante
» che xe benedeto,
» coragio, Catina
» la beva un pocheto.»
— No, grazie, no bevo,
— no posso ingiotir,
— me trema la lengua,
—me par de morir,
― me sento che bala
— perfin el çervelo,
— el fa de la testa
— un vero maçelo,
— che smanie, che spizza
— per tuta la vita!
— creature, ve prego,
― ciameme el mio Tita;
— corè, zo, s'un salto
— mandèlo a ciamar,
— go el stomego in tochi,
— no posso più star!
— el ganfo scomenzia
— vegnir su sto pie,
― la creda, Rosina,
― no digo busie;
— me trema el barbusso,
— me gira la testa,
— ancora un'oreta
— de vita me resta.... —
«Xe roba del sangue,
» xe roba da gnente,
» Catina; coragio!
» la vede la zente
» da vera curiosa
» puzada al balcon?»
— O Dio che dolori!
— o Dio che passion! —
«Ma in fin po de i conti,
» che sena xe sta?
» un fato de sangue
» la ga spaventà?»
— De sangue, de sangue
— xe sta proprio un fato;
— go visto un sorzeto
— magnar dal mio gato. ―