Un creditor
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Una discussion su la luna | Edission e fonte ▼ | Un fato de sangue → |
Chechi Borida, che per mania
gaveva sempre l'economia,
el avanzava da zior Zaneto
qualche francheto;
e questo, furbo, co 'l lo vedeva
vegnirghe incontro, el la bateva
drio d'una cale o zo d'un campo
via, come 'l lampo.
Ma Chechi un zorno, che za in sto caso
capiva d'esser girà pel naso,
el se ga messo postà bel belo
proprio in campielo;
e, apena visto ch'el ga Zaneto,
el me lo ferma pien de rispeto
e, saludandolo pulitamente,
el ghe va 'rente.
— Oh! quanto tempo che no lo vedo, —
ghe dixe Chechi, ― ma co sto fredo
— mi no me movo mai dal tinelo
se no xe belo,
— e po indisposto so sta anca in leto
― co un mal de testa stramaledeto...
― ma lo ciera çerto no fala,
— no, come vala? —
«Via come 'l vento!» risponde l'altro,
e s'un momento, da vero scaltro,
el volta in pressa la cantonada
de quela strada.
Chechi capisse che no val gnente
imprestar bezzi a çerta zente,
ben rifletendo che «a chi sparagna
la gata magna.»