Una discussion su la luna
|
Edission original: |
Carlo Rumor, Chi le conta xe qua, Venezia, Scarabellin, 1904 |
|
Fonte: |
Indice:Rumor - Chi le conta xe qua, Venezia, Scarabellin, 1904.pdf |
| ← Una bruta figura | Edission e fonte ▼ | Un creditor → |
Gera note, e drento un treno
che da Cioza va a Loreo
do studenti de liceo
gera in gran conversazion.
Un de lori sosteneva
che la luna xe una sola,
che sta cossa andando a scola,
el ga sempre sentìo dir.
L'altro inveçe che credeva
esser omo de gran mondo,
contrariava ciaro e tondo
del compagno l'opinion:
el dixeva che, da quando
lu ciamarse pol studente,
consultà profondamente
el gaveva la question;
che la luna nata a Cioza
de sicuro no podeva
esser quella ch'el vedeva
da i sporteli del vagon.
A pianar sto batibeco
monta in treno finalmente
un signor che de sapiente
ga la smania d'esser za.
Dixe el primo de i studenti:
― Scusi tanto, sa, signore,
― ci potrebbe, per favore,
― dare un po' di spiegazion?
― Siamo in due che già da un pezzo
― discutiamo sulla luna,
― dica un po' chi ha la fortuna
― di noi due d'aver ragion:
― non le par che quella luna
― che da Chioggia scorgevamo,
― della luna ch'or vediamo
― sia precisa, tale e qual? ―
La domanda ga confuso
quel gran omo de talento,
che, a le strete, in quel momento
ga concluso la question:
«Ma, sentite giovanotti,
» io non son mai stato a Chioggia,
» e non so qual sia la foggia
» della luna ch'è laggiù.»