Un Sogno (Giovanni Pozzobon, 1817)
|
Edission original: |
Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 12.djvu |
| Edission e fonte ▼ |
Cara Catina mia, son insognà
Una cossa che a dirla me vergogno,
Son insognà (ma al fin l'è stato un sogno)
4Che mì con vu me gera maridà.
Ma l'uno e l'altro gera desperà
Per aver fato sto grosso codogno.
Da una banda gavevimo el Bisogno,
8E da quel'altra la Necessità.
Scontenti, malinconici, afamai,
Ogni dì sempre più l'andava mal;
11Mocolavimo come renegai!
E senza bezzi e senza capital,
Pieni de cuche, de miserie e guai
14Alfin semo redoti a l'Ospeal.
Se sto sogno bestial
El se verificasse, che nol so,
17Staressimo pur freschi tuti do'!