Torna la moda del Cavalier Servente
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Canzonetta a Gilda | Edission e fonte ▼ | Per Nozze → |
Ogni dama veneziana
Quasi fusse per dover
Per usanza molto vana
La godeva el cavalier.
Ma quei tempi de rispeto
Che a servir gera un onor
I xe andadi per dispeto
S'à calmà tanto furor.
I pensieri de la zente
Xe ben altri deventai
L'omo più ciamar servente
Cavalier se dixe mai.
Ma da che 'na circostanza
A Venezia è capitada
De sta moda ancor l'usanza
Par che vogia farse strada
Ghe voleva in verità
Qualche fausto avenimento
Che tornar facesse qua
Questo gran divertimento.
Che a le done imparentae
Co' blason co' sangue blù
Le vegnisse contentae
Per sta moda che va su.
Za in ancùo no ghe riguardo
De far quelo che se vol,
Abolìo no xe lo sguardo,
Se dà quelo che se pol.
Da ciò el brazzo, la manina,
Po' la fronte, po'.... l'onor
La xe moda genuina
Che fa andar in gran sudor.
Minga za da la vergogna
Ma siben da l'ambizion
Perchè ognuna gnanca sogna
D'aver fato brute azion.
Se un gran principe vegnisse,
Più l'onor saria più grando,
Xa le ciacole finisse
E col tempo va sfumando.
Se a Milano se a Beriin
Mia muger volesse andar
So sicuro che visin
Cavalier no' pol mancar.
Vegna dunque sta gran moda
Che a le done fa piaser,
Vedarè che za se loda
Se la dona à el cavalier.